Atualità

USP – Per la fin dla sajon nvieia l Museum Ladin Ciastel de Tor n dumënia 31 de utober a n gran batadù metù a jì deberieda cun i Destudafuech da S.Martin.

USP - Feter 150 milion de euro fej ora la chëutes sëuraprò che la Jonta provinziela pudëssa tò ite, ma ne l fej nia per no ti ciarië su pëis ai zitadins. Chësc ie unì dat pro ncuei (25 utober) dajan pro definitivamënter la pruposta de lege sun bilanz cun lege finanziera 2011. I majeri capituli fej ora la chëutes IRAP y IRPEF.

USP – La Jonta provinziela à ncuei (25 utober) fat ora i prinzipies dla televijion per nfurmazion turistica. Chësc canal nuef dëssa arjonjer i feter 5,5 milion de turisć che vën a passé la feries tla provinzia de Bulsan.

USP – 25 uties da mont passa cun scumenciamënt dl 2011 ala Provinzia. Co che chëstes dëssa unì aministredes ne san al mumënt nia. Cun n articul dla lege finanziera vëniel udù dant de slungë de n ann l sistem de aministrazion atuel. La Jonta provinziela à ncuei (25 utober) tratà chësc argumënt.

USP – La Jonta provinziela à te si senteda da ncuei (25 utober) nce rujenà dla prutestes n cont dla reforma tlinica per chël che reverda l spedel de Sanciana/Innichen. - Nvit de Durnwalder ai ujins de sëuramont.

USP -La Jonta provinziela à ncuei (25 utober) giapà l’ultima nfurmazions da pert dl’Austria per via de frabiché l tunel de basa dl Prëner. I lëures ne vën nia spustei. A scumenciamënt dl 2011 ie udù dant de scrì ora i lëures y ntan l ann iel prugramà de scumencé a giavé ora l tunel danter Franzensfeste y Dispruch. Tl medemo tëmp dëssa nce unì fai i lëures danter Pruca y Franzensfeste per ruvé permez al tunel.

USP – la Jonta provinziela à ncuei (25 utober) dat pro i statuc y tl medemo tëmp nce l cunsëi nuef dl zënter de tueda y inuvazion TIS (Techno Innovation South Tyrol). Reprejentanta ladina tl cunsëi de aministrazion ie Manuela Nocker de Gherdëina.

USP – Te si senteda da ncuei (25 utober) à la Jonta provinziela dat pro de fé deventé la SMG, Südtiroler Marketing Gesellschaft, na sozietà defin publica.

USP - Nsenië la rujenedes ai mëndri te chëla che n les adrova per purté dant cuntenuc d’autra materies: chësc sarà l argumënt zentrel dl cunvëni dai 28 nchin ai 30 de utober a Urtijëi. La metodologies nueves de nseniamënt unirà tratedes da feter 200 reprejentanc de cin mendranzes. La Ntendënza Ladina deberieda cun i Istituc Pedagogics de rujeneda ladina y taliana nvieia nsenianc, esperc y duc i nteressei.

USP – Pra la mëisa de descuscion dl Di dla Cultura Ladina (comunicat a pert) iel ncuei, 22 utober, unì nunzià de plu ponc per svilupé i media de rujeneda ladina. L à rujenà l assessëur Florian Mussner, l diretëur dla RAI de Bulsan Carlo Corazzola, la redadëssa de Gana Ingrid Runggaldier y l diretëur de La Usc di Ladins Iaco Rigo, cun la muderazion de Diego Clara.