Atualità

USP – L’aministrazion de scola vën regulamenteda da nuef, l barat de puscions cun l Stat va inant, la regulamentazion per la uties da mont unirà fata da nuef: chisc ie stai i argumënc de majer nteres tratei ncuei (11 utober) dala Jonta provinziela tl cheder dla pruposta de bilanz 2011 che giapà l bënsté di assessëures.

USP – La Jonta provinziela de Bulsan à numinà ot cumisseres per l ejam de bilinguism.

USP – Sun la streda di jëufs danter Plan y Plan de Gralba iel da n lunesc, 11 de utober da fé cont cun n semafer. La rejon ie che l Ufize provinziel per la stredes fej analises dla fundamënta de streda. I lëures ie udui dant nchin ala fin de utober.

USP – N merdi 12 de utober uniral sun la streda dla Val Badia scumencià lëures per mëter ju da nuef asfalt ti raioin dl Punt de Fer. Nchin ai 21 de utober iel da fé cont cun n semafer.

USP – Cuatieres sun raions dla casermes: l barat che ie unì marciadà danter Provinzia y Stat unirà a se l dé te sies fases, doves ie bele tl lëur. “Te tëmp de sies ani ulons avëi stlut ju duc i lëures y avëi sëurantëut la puscions che on fat ora” nsci l presidënt dla Provinzia Durnwalder. N ie tl lëur de scrì ora i lëures tla caserma de Corvara.

USP – Co che la ie cun la defendura de mendranza tla Provinzia de Bulsan à l assessëur Florian Mussner ncuei, 5 utober prejentà a na delegazion dala Macedonia. N reprejentanza dl presidënt dla provinzia à Mussner metù a cuer la recunescënza dl status de mendranza, y che la mendranzes vën ududes sciche arichimënt. - Ladins sciche grupa de ejëmpl.

USP – Feter 700 cronisc’ dal Tirol dl Nord, Est y Sud se dedichea ala documentazion de tant che suzed te si luech. N dumënia, 3 de utober, se à i cronisc’ de chisc raions ancuntà per n barat y per rujené de proiec deberieda.

USP – Tenì aut l livel te na mesura che se lascia nce finanzië tl daunì y mantenì i 7 spedei dla provinzia, dut chësc zënza smëndrì dassënn l servisc ma nuzan miec cooperazions y zëntri de cumpetënza. Chësc ie la basa de descuscion prejenteda ncuei (5 utober) a Bulsan dal assessëur de cumpetënza Richard Theiner deberieda cun i respunsabli dl’Azienda sanitera provinziela. “Lauron sun n’assistënza sun dut l raion tenian l livel nternaziunel, chësc documënt ie na basa de descuscion” à spiegà Theiner.

USP – L mpëni dla maestres y di maestri vën ncuei unerà particularmënter ajache l ie l di mundiel di maestri. I assessëures ala scola Sabina Kasslatter Mur, Florian Mussner, Christian Tommasini y Hans Berger to l’ucajion per dé esprescion a si stima per i nsenianc de uni livel de scola y culaburadëures pedagogics tl scolines.

USP – La partizion dl bilanz provinziel y la reforma tlinica ie stai i argumënc cun chëi che la Jonta provinziela se à dat ju prinzipalmënter te si senteda da ncuei, 04 de utober. I argumënc de majer nteres à l Presidënt dla Provinzia prejentà riesc do la senteda te cunferënza stampa.