Atualità

USP – L stradon a Urtijëi vën slargià al’autëza dl puent de Setil a na maniera che i auti possa raidé ite sun l puent zënza mpifé l muvimënt sun stradon. Chësc ntervënt dl Servisc provinziel per la stredes à l fin de miuré l muvimënt sun l stradon de Gherdëina ntan la sajons autes. N fej cont de finé i lëures per la fin de nuvëmber.

L’atività dla Union Generela di Ladins dla Dolomites vën chëst ann sustenida cun 210.860 Euro dala man publica. Sëuraprò ie l assessëur Florian Mussner n tratatives per sustenì cun autri 12.000 euro l proiet dla zaita Gana, la njonta de la Usc di Ladins.

USP – Na delegazion di diretëures dla scoles ladins cun i respunsabli dl’istituzions de scola à te n viac de furmazion ti Grijons pudù mparé dal’esperienzes di jurmans tla Svizra. L fin dla scumenciadiva dl ntendënt ladin Roland Verra, ie stat de studië la situazion educativa, culturela y soziela dla mendranza rumancia tl Canton Cuera (Chur).

USP – Partic y grupes che uel se prejenté per la veles de chemun dl 21 de nuvëmber a Corvara, possa n vënderdi y sada, 8 y 9 de utober dé ju i sënies de lista. A pië do i sënies ie la Presidënza dla Jonta provinziela. L dé ju di sënies, nce sce l ne ie nia de ublianza, cumporta nce scunanza per l sëni.

USP – I paiamënc dla Provinzia jirà da moinla plu riesc y a na maniera plu scëmpla. Chësc ie mesun tres la ntroduzion di paiamënc online mpede la maniera de lëur cun truep papier. “Sibe l barat di documënc che va debujën, che nce i paiamënc nstësc unirà fai sun via eletronica” nscì l assessëur ala finanzes Roberto Bizzo.

USP – Una dla majera reformes purtedes inant dala Jonta provinziela de Bulsan, la regulamentazion nueva dla scola auta va n drova duman mierculdi 29 de setëmber. La lege provinziela ie ncuei unida publicheda tla gazëta ufiziela dla region.

USP - N capitul dla storia de frabiché stredes iel dal ultimo fin dl’ena da udëi tla Cësa dl parch naturel Fanes-Sennes-Braies a Al Plan de Mareo. Nchin ala fin de utober iel da udëi na mostra de coche l fova unì frabicà la streda da La Ila nchin sun Valparora. L Archif provinziel de Bulsan mostra a chësta maniera nce culegamënc danter l frabiché stredes y l svilup turistich.

USP – Dla reforma tlinica, da na prima partizion di bilanz provinziel per l ann che vën y dla termes de Maran à la Jonta provinziela tratà prinzipalmënter te si senteda de ncuei, 27 de setëmber. I ponc de majer nteres, à l presidënt prejentà riesc do la senteda te cunferënza stampa.

USP – L Istitut Culturel Ladin Micurà de Rü à n cunsëi de istitut nuef. La Jonta provinziela à te si senteda da ncuei (27 setëmber) dat pro l Cunsëi de Istitut tenian cont dla prupostes dla lies cultureles y di chemuns dla Val Badia y de Gherdëina.

USP – Da ncuei da sëira, 27 de setëmber vën la streda dla Val Badia sareda danter Mantëna Todëscia y Longega. I lëures de nuet jirà inant ntan duta l’ena.