Atualità

USP – La scoles de mujiga de rujeneda tudëscia y ladina se anjinia al proscimo ann de scola. Chisc dis iel unì sëurandat passa 120 stieres. Tla scoles ladines ie unì sëurandat n pue’passa mesa la stieres a desposizion.

USP – I assessëures Florian Mussner y Sabina Kasslatter Mur tulerà n sada 7 de agost pert ala festa di 50 ani Museum de Gherdëina. Nce l ntendënt ala scoles ladines Roland Verra tenirà na rujeneda sun l patrimone culturel de Gherdëina.

USP – Tl ann 2009 iel ti raions dl’Elpes unì cumpedà passa 20 mile strutures che a pità de ndut feter 817.000 liec turistics. L ie stat 27,8 milion de persones che ie states de ndut 111,9 milion de nuetes. Chisc y d’autri resultac n cont dl muvimënt turistich tl cianton Tessin, Grijons y St. Gallen tla Svizra, ti Bundesländer Vorarlberg, Tirol y Salzburg, l Bayern y la provinzies de Bulsan, Trënt, Belun y Sondrio ie publichei te na plata de nfurmazion dl ASTAT.

USP – L ie deventà tradizion che l presidënt dla provinzia Luis Durnwalder prejënta d’instà na si analisa sun la situazion atuela danter Bulsan, Roma y Brüssel. La cunferënza stampa a cësa de Durnwalder a Pfalzen, sarà chëst ann n juebia che vën, 12 de agost dala 10 danmesdì.

USP – L proiet de valorisazion dl zënter de S. Crestina, nvià via dal Assessorat provinziel per l cumerz, ie ruvà te si fasa plu cuncreta. Te si senteda dl 3 de agost se à la grupa de lëur sëurantëut de lauré ora na desëina de ideies per miuré l’atratività dl zënter y nsci nce sustenì l svilup economich y de cunseguënza la cualità de vita tl luech.

USP – Per l 14esim iede vën la populazion nfurmeda n cont de prestazions che l’Aministrazion dla Provinzia de Bulsan à arjont. Te chësta edizion co che dl 2009 ie unì spendù scioldi, i pruvedimënc per smëndri burocrazia, l’aspet de economicità y l vester daujin ai zitadins. La relazion de atività ie da pudëi desciarië da internet sot a http://www.provincia.bz.it/relazioneattivita2009 y sarà ala fin de agost nce da giapé te forma stampeda tl Ufize stampa dla Provinzia o tla sënta dl ASTAT.

USP – Permez a dan diesc ani ie la cumpëida de liec ti hotiei aumenteda de 3,7%, tl medemo tëmp ie la cumpëida de nuetes afitedes aumenteda de 18,7%. “Chësta zifres desmostra che son n’ezezion” à dit l assessëur al turism Hans Berger n ucajion dl ancunteda cun i respunsabli dl SMG per rujené dl svilup turistich. “Messon lauré a na maniera che chësc svilup posse jì inant” mët a cuer l assessëur Berger.

USP – La regulamentazion dl sistem de cuntribuc tl ciamp dl’energia y l sustëni a nuzé energia che se lascia nuzé plu iedesc: chësc ie l fin dla lege provinziela che unirà publicheda n merdi 3 de agost tla Gazëta ufiziela dla Region. La lege fova unida laureda ora dal Assessorat de Michl Laimer y pona purteda te Cunsëi provinziel dala Jonta provinziela.

USP – Nchin ala fin de agost à nteressei a deventé iagri mo dl’aurela per se scrì ite al ejam da ciacia tl Ufize provinziel per la ciacia. I ejams unirà tenii ala fin de setëmber y prims de utober a San Laurënz y Maran/Obermais.

USP – N vënderdi ai 6 de agost uniral tl Istitut Ladin Mirucrà de Rü giaurì na mostra de fotografies sun la Dolomites de Gustav Willeit. L se trata dla terza de ndut cater mostres artistiches ntan chësc instà metudes a jì n culaburazion cun la lia “Ert por i Ladins”. La giaurida ai 6 de agost a S. Martin de Tor scumëncia dala 6 da sëira.