Atualità

USP – La Jonta provinziela de Bulsan à dat pro truep adatamënc al plann provinziela di purtoies da schi y mplanc portamont. Danter chisc nce doi purtoies ju per l Plan de Corones y Marinzen a Ciastel. Sciche l ie unì prejentà te cunferënza stampa, iel stat na majera descuscion per via dl’imigrazion y dla reforma dla scola, ma zënza ruvé a na dezijion.

USP – Per la prima ancunteda cun l minister al’agricoltura nuef Giancarlo Galan, furnerà l assessëur provinziel Hans Berger duman (8 juni) a Roma. Argumënt zentrel danter i doi respunsabli per l lëur da paur sarà i organismes mudei geneticamënter.

USP – Cun la fin dl ann de scola, ai 13 de juni, vel i orars nueves da instà per l trasport publich che reverda dantaprima la curieres. Duta la nuviteies ie bele publichedes sun internet. Per l prim iede, nsci l assessëur Widmann, ie i orars nce unì fai tla rujeneda ladina.

USP - A San Ciascian iel n merdi sëira unì abinà l cuarto cajo de rabia tla provinzia de Bulsan. Aldò dl servisc provinziel de dutor dal bestiam, se tratela nce chëst iede de na bolp. „Nce sce l ie unì abinà chësc cajo, desmostra la nrescides che l’azion de dlavea à purtà fruc“ nsci l assessëur Hans Berger che à cunedì che l unirà inò lascià ora trapules de dlavea.

USP – „La politica regiunela dl’Europa dëssa tò ite duta la regions europees, l ie na politica de nvestizions y nia de dunfierta“. Chësc ie l pensier che l cumisser dl’Europa per la politica regiunela Johannes Hahn à purtà ncuei (prim de juni) pra si vijita a Bulsan cumpanieda da trëi presidënc provinziei dl’Euregio.

USP – L stradon de Gherdëina à messù unì sarà a Puntives ajache la gran plueies de mei ova fat muever de gran purons. Do prim lëures de prëscia possen sën inò furné de viers de Pruca aldò de n semafer. L Assessorat provinziel per lëures publics à scrit ora de prëscia i lëures per fé da nuef l mur de 90 metri.

USP – N juebia ai 10 de juni uniral sëurandat de ndut 28 stieres tla scolines ladines per l proscimo ann de scola. Maestres che ie tla graduatories per trasferimënc y per ncëries a tëmp determinà ie nviedes tla direzion dla scolines a Piculin.

USP - Tl cheder dla mostra „la fotografia por comunichè...“ tl Museum Ladin Ciastel de Tor, vëniel n sada ai 5 de juni metù a jì n domesdì de nfurmazion sun la fotografia.

USP – La Jonta provinziela de Bulsan à ncuei (31 de mei) tëut n cunsciderazion la prima nfurmazions sun la manovra dl Guviern a Roma per smëndrì l debit publich. Danter i argumënc de majer nteres iel nce unì rujenà l cunsëi de aministrazion dl autostreda dl Prëner y de na documentazion sun Magnago. Pra i lëures publics uniral dat pëis al adurvé material dla frabiches trates ju.

USP – Na lingia de ancuntedes iel sun l program de vijita dl cumisser europeich Johannes Hahn, de duman, prim de juni tla provinzia de Bulsan. L cumisser per la politica regiunela sarà pra la cunferënza metuda a jì dal Ufize dl’Euregio a Bulsan sun la politica regiunela dl’Europa y vijiterà pona l cantier dl tunel dl Prëner a Mauls. Per la 11.30 ie udù dant na cunferënza stampa.