Atualità

USP – L servisc dla posta tl Südtirol dëssa unì miurà, nce sce l se damanda mudazions fundamenteles tl’urganisazion, strutura y cumpetënza. Chësc ie unit ora dal’ancunteda de ncuei (8 auril) a Roma danter la Presidënt dla Provinzia Durnwalder y l diretëur dla Posta taliana Massimo Sarmi.

USP - Astrid Kofler lî fora de so romann „Lebenskörner“ ai 15 d’aurì dl 2010. La Biblioteca provinziala y la ciasa edituria Haymon inviëia a tó pert ala incuntada tla Teßmann.

USP - Cun i respunsabli dla RAI à l Presidënt dla Provinzia Luis Durnwalder ncuei (8 auril) rujenà a Roma dla puscibltà de n finanziamënt dla RAI de Bulsan da pert dla Provinzia, dl daunì dla redazion ladina y de tò su de plu culaburadëures.

USP – Per l ann de scola che vën se à tla scoles ladines scrit ite de plu sculeies permez al ann passà. La cumpëida de sculeies jirà de setëmber dantaprima su tla scoles autes ulache l sarà 51 sculeies de plu. “L aumënt tla scoles autes ie n sëni de crëta de viers dla scola ladina” sorissea l assessëur ladin Florian Mussner.

USP - Sculeies dla valedes ladines se à da permò muserà ti juesc nterladins sportives danter reprejentanzes dla cin’ valedes ntëur l Sela. La bela tradizion ie chëst ann unida tenida inant metan a jì n turnoi de hockey danter la scuadres dla scoles mesanes. Tl stadio de Alie (Alleghe) à venciù i sculeies de Fascia dan chëi de Fedom y Gherdëina.

USP – Ajache l vën laurà sun la streda danter S.Piere y Laion, muessa la streda unì sareda n juebia y vënderdi 8 y 9 de auril. L muvimënt di auti vën avisà ora per l stradon de Gherdëina da Tluses ite.

USP – Na delegazion provinziela dla scola y cultura ladina deberieda cun l assessëur Florian Mussner à ncuei (7 auril) pudù udëi de prima persona la gran avëi storich sun i ladins che ie tl Archif provinziel a Bulsan. “L ie debujën de mantenì ma nce de lauré su y valorisé chësta documentazion de gran valor sun la storia di ladins” se mbincia l assessëur provinziel ladin.

USP – Ancuntedes per rujené dla puscibltà che la Provinzia sëurantole la Posta, n finanziamënt dla RAI de Bulsan y frabiché na perjon nueva a Bulsan: dut chësc ie sun l program dl viac dl Presidënt dla Provinzia Luis Durnwalder de duman 8 auril a Roma.

USP – L aplicazion dl acurdanza de Milan danter Provinzia y Stat, tla pert che reverda n finanziamënt de 40 milion de euro per i chemuns de sëida. De chësc argumënt à l presidënt dla Provinzia Luis Durnwalder ncuei (prim aril) rujenà cun i ambolc di chemuns ladins sëuramont.

USP – 35 culaburadëures pedagogiches dla scolines ladines à nsëira (31 merz) pià do l diplom per avëi stlut ju cun suzes trëi ani de furmazion nterna. Cun la sëurandata tla Scolina Salieta a Urtijëi iel unì fat n var inant n cont de cualità dla scolina ladina. L valor de chësc mumënt ie unì sorissà dai respunsabli de duta la scola ladina y dl Istitut pedagogich ladin deberieda cun l assessëur ladin Florian Mussner.