Atualità

USP – Ntan chëst ena possa nteressei a deventé mëinacrëp mo se scrì ite al ejam de amiscion per fé la furmazion. Chiche se scrij ite nchin a n vënderdi ai 5 de fauré tl Ufize provinziel dl alpinism damanda de fé pea la furmazion che unirà tenida ala fin de fauré y ala fin de merz.

USP – La materies che unirà damandedes tla segonda prova scrita dl’ejam de stat tla scoles autes ladines ie unides crisses ora. Tla trëi sezions defrëntes se tratela de economia aziendela, rujenedes fulestieres y dessëni. La Ntendënza ladina a una cun l Minister dl Istruzion a Roma à nce fat ora ciuna materies che vën damandedes ora a usc dai cumëmbri dla cumiscion che vën da d’autra scoles.

USP – Cumplimënc dal assessëur provinziel Florian Mussner a Aron Demetz che ie unì numinà prufessëur tl’Academia delle Belle Arti de Carrara. “L fej gran plajëi y legrëza che l cunesciù artist ladin possa te chësta ncëria dé inant a jëuni si savëi dl ziplé tipich per Gherdëina” dij Mussner.

USP – L Südtirol pieta de bona cundizions per la preparazion de scuadres de juech al palé per i campionac dl mond. Chësc ie stat l pensier zentrel che l presidënt dla provinzia Durnwalder à purtà dant ncuei danmesdì (28 jené) ntan la cunferënza stampa dla naziunela tudëscia per prejenté la preparazion ai campionac dl mont, che i fajerà nce tl Überetsch. Chësta preparazion dla scuadra cumporta, aldò de Durnwalder, na gran fazion de bon inuem per Südtirol.

Tl cheder dla mostra di libri de chësc ann „Bücherwelten im Waltherhaus“ vëgn la Biblioteca Provinziala rapresentada tres na lerch cun libri da ascutè.

USP – Per ativiteies cultureles, artisc’ o ativiteies de furmazion n generel ti ciamp dla cultura ladina possen nchin ai prim de fauré 2010 damandé cuntribuc dala Provinzia de Bulsan.

USP – Sota l inuem JAM, che miena "Junior Assistant Manager" vëniel tla scola prufesciunela per l artejanat y ndustria a Bulsan pità na furmazion per manager jëuni. Do avëi fat 500 ëura de nseniamënt sëurandarà l presidënt dla provinzia Durnwalder ai 4 de fauré i diploms dla furmazion JAM.

USP - Genitores possa mo nchin ai prim de fauré scrì ite si mutons y mutans ala scoles de ublianza per l ann de scola che vën. Davia che l 31 de jené ie de dumënia, vel l lunesc sciche ultimo di per la iscrizions ala scoles elementeres y mesanes tla valedes ladines. L’iscrizions ala scoles autes te Gherdëina y tla Val Badia possa unì fates nchin ai 31 de merz.

L’età media di jëuni sëura 18 ani che vif dai genitori ie auzeda a 28,2 ani (2007) permez ai 25,1 ani tl ann 1990. I mutons se n va plu tert da cësa permez ala mutans. I lëures de cësa y l’educazion di mëndri vën daniëura udui sciche cossa dl’ëiles. Tl ann 2006 iel di ëi danter 41 y 50 ani stat 8,4% che a damandà de sté ora dl lëur per paternità, di ëi danter 51 y 60 ani iel me stat 2,8%. La perzentuela de chëi che porta a cësa n davani ie pra i ëi cun 80% plu auta, permez al’ëiles cun 60%. Chëstes ie me n valguna dla nfurmazions che ie publichedes sun l cudejel „Haushalte in Südtirol“, dat ora chisc dis dai Istitut provinziel de statistica (ASTAT).

USP – 65 ani do la fin dl Olocaust ne possa nia sfanté l lecort al massacher di judieres, nemics militeres y politics ti lager nazisc’. “I testemonesc che à mussu fé pea chëi tëmps de grandiscimi patimënc vën do y do a mancë, ma si arpejon muessa unì tenida n vita” nsci l presidënt dla provinzia Durnwalder per l di de lecort al Olocaust (duman) ai 27 de jené.