Atualità

USP – Duman 28 de utober vëniel tla Provinzia scumencià a destudé ju la trasmiscion televisiva analogica per ti fé lerch al sistem digitel. L prim raion reverda Bulsan, l Unterland y la val Sarentin. Chi che uel se nuzé di vantajes dla televijion digitela adrova n decoder, ntergà tla televijion o a pert y muessa crì da nuef i canai. Tla Val Badia y te Gherdëina saral dal 9 de nuvëmber da udëi la televijion digitela.

USP – Feter 516 milion de Euro destinea la Provinzia de Bulsan per finanzië i chemuns tl ann 2010. Chësta ie (ncuei) 27 de utober stata la basa dla tratatives danter la Provinzia cun si presidënt Durnwalder y reprejentanc dl Cunsorz di chemuns. N majer pëis à abù l bujën de judé pea a sparanië. Ai chemuns ladins uniral metù a desposizion 308.000 Euro per l lëur sëuraprò cun la trëi rujenedes.

USP – La Jonta provinziela à dat pro che pra la streda da Al Plan de Mareo nchin a La Plì vëniel fat lëures sëuraprò. Sun doi toc de chësta streda ie la Provinzia de Bulsan tl lëur de miuré la streda fajan nce prutezions de segurëza. De ndut iel udù dant n nvestimënt de 1,38 milion de Euro.

USP – La situazion mudeda di mëndri y dla families te nosc tëmps mpënia for deplù l’atività te scolina. Te n ancunteda cun l assessëur provinziel ladin Florian Mussner à reprejentantes dl personal pedagogich dla scolina tudëscia y ladina (LSKA) purtà dant ciunes che ie al mumënt la majera dificulteies per la educadësses per ti vester ala situazion.

USP – La Jonta provinziela de Bulsan à te si senteda de (ncuei) lunesc 26 de utober tëut a cunescënza i resultac di referendum dijan de ulëi se dé ju cun i argumënc nce sce la populazion ne à nia azetà a maiuranza la prupostes de lege. I argumënc plu mpurtanc ora dla senteda dla Jonta che l presidënt à prejentà ala stampa reverda l tunel de basa dl prëner y la pruposta de lege per imigrei.

USP – Ncuei danmesdì iel dala 12.00 unì finà de cumpedé ora la zedules di referendum de (inier) dumënia 25 de utober. La cumpëides de uni una dla 488 sezions de vela ie unides fates al savëi tres l sistem cun l BlackBarry.

USP – Da ncuei, lunesc 26 de utober, vëniel sarà la zircunvalazion de S. Crestina per pudëi mëter su i dlandri di doi majeri puenc. Per via de chisc lëures vën l muvimënt di auti avisà ora per cater enes, ntan la duta la 24 ëura, sun la vedla streda prinzipela de S.Crestina.

USP - L quorum dl 40% ne ie nia unì arjont pra i referendum provinziei. Canche l ie unì stlut la sezions de vela dala diesc da sëira, ie n media 37,98% di zitadins stai a lité. La cin prupostes de lege ne ie a chësta maniera nia unides azetedes dala populazion, la regules ne vën nia mudedes.

USP – Dala cinch domesdì ie ncuei dumënia, 25 de utober unì cumpedà per l segondo iede do tan de zitadins che ie stai a lité i referendum provinzei. 24,4 percënt à lità l referendum per l frabiché cuatieres. L referendum per regulamenté da nuef i segondi cuatieres à nchin la 17.00 lità 24,4 percënt, la pruposta di gran proiec à lità 24,4, chëla dla democrazia direta 24,5 percënt y 24,6 percënt ie jic al refrendum per via dl areoport.

USP - 8,8 percënt dla 390.398 persones cherdedes a lité i referendum provinziei ie ncuei dumënia, 25 de utober jites a lité nchin la 11 danmesdì l referendum per l frabiché cuatieres. L referendum per regulamenté da nuef i segondi cuatieres à nchin la 11 lità 8,8 percënt, la pruposta dla di gran proiec à lità 8,8, chëla dla democrazia direta 8,8 percënt y 8,9 percënt ie jic al referendum per via dl aeroport.