Atualità

USP – La jonta provinziela à ncuei danmesdì a Bulsan (22 utober) prejentà te na cunferënza stampa la cunseguënzes sce n dumënia vëniel azetà la prupostes de lege dl referendum. “Te de plu referendum ne curespuend l cuntenut nia al titul, i referendum reverda me particuleres de n sistem de aministrazion, n “scì” purtëssa a na situazion de cunfujion y che dà l mesun de fermé lëures bele scumencei” nsci i assessëures provinziei duc deberieda.

USP – Na cësa per pudëi, tant che se lascia, ruvé de reviers a la normalita da uni di mo dan l inviern: chësc ie chël che l presidënt dla Provinzia Durnwalder y l assessëur ai lëures publics Florian Mussner ti à mbincià n mierculdi (21 utober) a passa mile persones tuchedes dal tremot ti Abruzzo. Tl luech Ocre, 12 chilometri da L’Aquila à i aministradëures sëurandat 20 cëses prefrabichedes dala Provinzia de Bulsan.

USP – Cun i reprejentanc dl’economia se anconta l’assessëura provinziela Barbara Repetto ncuei mierculdi 21 de utober a La Val. L’assessëura prejenterà n proiet per sustenì l’economia.

USP – La Jonta provinziela à te si senteda da ncuei (19 utober) dat pro de ulëi auzé la chëuta turistica sun i segondi cuatieres. Chësc ie un di ponc zentrei dla pruposta de lege finanziera per l ann 2010 che l presidënt Durnwalder à prejentà ala stampa do la senteda.

USP – Ntan doi dis de furmazion à l Ufize provinziel per la defendura dla cuntreda deberieda cun la Lia di artejans (LVH/APA) metù a cuer a 70 scoaciamis l problem dl zemënt da asbest ti ciamins. I scoaciamins dëssa dantaprima mparé a cunëscer i pruvedimënc de segurëza.

USP – Tla Val Badia y te Gherdëina saral dal 9 de nuvëmber da udëi la televijion digitela. La listes di programs de televijion y radio ie unides ufizialisedes. La cumpëida di programs da udëi y audì ti luesc ladins ne ie nia dlonch unfat.

USP – Cun na pitla zeremonia iel ncuei vënderdi (16 utober) unì ufizialmënter stlut ju i lëures per l puent nuef cun sotpassaje a Corvara. L puent nuef dla streda statela lieia Corvara ala frazion de Colfosch. “Chësc lëur ie n ejëmpl de bona culaburazion danter Provinzia y Chemun” à sorissà l assessëur provinziel Florian Mussner.

USP – A 200 ani dala batalies tl Tirol se à la trëi jontes dl Tirol storich ncuei (15 utober) abinà Dispruch per se mëter a una sun argumënc che toca la trëi provinzies che va dal trasport al’energia, istruzion, nrescides y prejënza tl’Europa. I guvierns de Trënt, Bulsan y Tirol à fat ora de purté l’Euregio a n livel istituzionel plu aut metan su n ufize che ti stà do ala realisazion di pruvedimënc tëuc dant dal’Euregio.

USP – Da ncuei, juebia 15 de utober vëniel de nuet laurà sun la streda dla Val Badia danter Mantëna Todëscia y Longega per lavé ora i tuniei. Nchin ai 20 de utober puderan perchël me passé sun mesa larghëza de streda.

USP – Urganisazions y istituzions tl ciamp turistich che mët a jì manifestazions possa nchin ai 31 de utober damandé cuntribuc o sporsoring ala Provinzia de Bulsan. Chësta data vel per manifestazions danter l prim de jené y la fin de juni dl ann che vën.