Atualità

USP – Doi ressoluzions, una sun la politica dl’energia y una sun l svilup de tecnologies nfurmatiches à i presidënc dla regions dla chemunanza de lëur di raions dl’Elpes Arge-Alp ncuei (19 juni) dat pro a Flem ti Grijons. Tla Svizra iel ncuei nce fineda via la presidënza di Grijons per la chemunanza che tol ite 23 milion de persones, la dajan inant ala Provinzia de Bulsan.

USP – A na maniera nueva vëniel a S.Magdalena de Funes metù adum furmazion y ambient. Tlo vëniel frabicà deberieda na cësa per l Parch naturel Puez-Odles y na scolina cun scola elementera. I assessëures provinziei Florian Mussner y Michl Laimer à ncuei (17 juni) vijità i lëures.

USP – A Ciamaur, a Al Plan de Mareo, scumëncia i lëures per fé su berces de ruf che dëssa defënder l raion produtif da smueies. Te na segonda pert di lëures uniral fat mo d’autra berces acioche i ruves Foscedura y Ciamaur ne mëine nia material tl luech.

USP – Passa 43.000 parzeles te 15 chemuns cun passa 76.000 nserzions iel ntan i ultimi ani unì fat tl Ufize dl Liber fundier a Tluses. L assessëur Hans Berger à ncuei (16 juni) ufizialmënter stlut ju l’era di libri grosc a Tluses y nvià via l’era digitela. “A chësta maniera iel mesun ti ruvé permez plu riesc y cun manco burocrazia ala nfurmazions dl liber fundier, che ie sën nce plu avisa” à dit Berger.

USP – De utober fina l’era dla trasmiscion televisiva analogica. Cie che unirà do ie la televijion digitela mandeda ora per tiera. Ma cie ie pa veramënter l digitel sun tiera? Cie saral pa debujën per udëi la televijion? Co che funzionea pa n decoder? Chëstes ie me n valguna dla dumandes sun chëles che n giapa resposta sun la nueva plates internet www.provincia.bz.it/digitale-terrestre/ anjeniedes dala Provinzia de Bulsan, la RAS y la Informatica Alto Adige. La plates ie unides anjeniedes per nfurmé i zitadins dla mudazion dl sistem de televijion tl Südtirol ala fin de utober.

USP – Te n mëns, canche ai 16 de lugio uniral ufizialmënter giaurì la streda de zircunvalazion de S.Crestina scumëncia per si populazion n’era nueva. L muvimënt di auti unirà menà sun 1660 metri de streda nueva y tl zënter de S.Crestina miurerà dassënn la cualità de vita. A n mëns dala giaurida an bele scumencià a mëter ju l asfalt.

USP – L Cumisser dl’Europa per l Plurilinguism Leonhard Orban à dedicà na bela pert dla vijita tla Provinzia de Bulsan ala Ladinia. N lunesc domesdì (15 juni) al pra la vijita tl Museum Ladin a San Martin de Tor mustrà gran nteres per la realtà ladina cun si sistem de scola paritetica.

USP – Te n ancunteda danter l assessëur provinziel Florian Mussner y i diretëures dla scoles y scolines ladines iel unì metù sun mëisa i resultac de nrescides n cont dl livel de rujeneda, arjontes y problems de atualità. L assessëur Mussner se damanda plu culaburazion danter scola y istituzions cultureles.

USP – L cumisser dl’Europa per la mendranzes Orban à ncuei (15 juni) vijità la Jonta provinziela de Bulsan per mparé a cunëscer de prima persona co che l cunzet dl plurilinguism ie unì metù n drova tl Südtirol. Domesdì à l assessëur ladin Florian Mussner cumpanià l cumisser tla Ladinia.

USP – Fajan ressanamënc tlima dla cëses possen les auze de un n meter: chësc à la Jonta provinziela de Bulsan ncuei, 15 de juni dat pro te si senteda dl lunesc. I argumënc de majer nteres che ie unic prejentei te cunferënza stampa ie l recurs dl Guviern naziunel al bilanz provinziel, la pruposta de na reforma scolastica, scioldi nueves tl fond de rotazion y la reduzion de direzions dla scoles de mujiga.