Atualità

USP – La populazion dl Südtirol à ala fin dl ann 2008 arjont la cumpëida de 498.857 persones. Ntan chësc ann fejen cont che l unirà arjont la mesa miliarda. Passa mesa la populazion vif ora de zità. La cumpëida dla nascites ie caleda, ntan che la cumpëida di defonc ie aumenteda. A chësta maniera depënd la cumpëida dl populazion dantaprima dala defrënzia de chëi che ie jic a sté demez y de chëi che ie ruvei caprò. Tla valedes ladines iel unì cumpedà 19.646 persones y 6.668 families. La families ladines cumpëida n media 2,8 persones permez ala media provinziela de 2,5.

USP – Da Bulsan nchin sun l Renon te manco de 12 menuc. Chësc sarà mesun cun la furnadoia nueva che ie unida festejeda ncuei (14 mei) y che unirà giaurida al publich l’ena che vën. La furnadoia nueva cumporta na revoluzion n cont dl trasport publich tl raion dla zità de Bulsan cun n mplant, danter i plu modernes dl mond.

USP – Studënc de duta la valedes ladines se à dat ju cun leteratura y à prejentà lëures de bon livel. La premiazion dl cuncors de leteratura per la scoles ladines “Nos tl dialogh intercultural”, unirà tenida n merdi che vën, 19 de mei, dala 10 danmesdì tla scola auta Raetia a Urtijëi. L cuncors per sculeies ie unì metù a jì dala Ntendënza per la scoles ladines deberieda cun l Istitut Pedagogich Ladin, la Union Generela di Ladins dla Dolomites y i trëi Istituc Ladins de San Martin de Tor, Vich y Col de S. Lizia.

USP- A Corvara muessa la streda statela unì sareda da mierculdi 13 de mei nchin ala fin de juni ajache l vën fat n sotpassaje.

USP – La Jonta provinziela de Bulsan se à ncuei (11 mei) abinà 4,5 chilometri sot te n crëp y 400 metri sota tiera per se fé n cheder di lëures per l tunel de prova per chël che deventerà l tunel de basa dla Prëner. “L proiet dl tunel ie bele realtà” à dit l presidënt ntan la vijita. Duta la Jonta provinziela à pudù udëi che l sas ie miëur de chël che n se ova aspità.

USP – La stiera per la direzion dla Repartizion provinziela per Afares dla Cumenanza Europeica ie unida scrit ora da nuef. La dumandes possa unì dantes ju nchin ai 10 de juni.

USP - Te Sëlva iel unì giaurì locai nueves dl Istitut Culturel Ladin y dla Bibliotech. Dala culaburazion dla istituzions nasc n zënter culturel te Sëlva per dé forza al identità ladina. L assessëur provinziel Florian Mussner y l ambolt Roland Demetz à n sada (9 mei) giaurì ufizialmënter chësta sënta de culaburazion culturela. Te chësta ucajion ie nce unì prejentà la plata internet dla mostra “Viac tla Ladinia”.

USP – La mostra interregiunela 2009 ie unida giaurida ncuei sada (9 mei) tl furtin de Furtëza, dal presidënt dla Provinzia Durnwalder deberieda cun i assessëures ala cultura dla Provinzia de Bulsan, de Trënt y dl Lond Tirol. „N labirint per abiné la lidëza“ chësc ie l pensier zentrel dla mostra che resta davierta nchin ala fin de utober.

USP - Sonn de tambürli, n arald y le oracl - le vedl lëgn , che röia da cuntè la storia dl virus “Syndrome“ che s’à mudé y de sü efe. Incö (9 de mà 2009) nes àl tla introduziun dla festa finala dl concurs online „syndrome 09" acompagné chilò sön la staziun dla ferata de Franzensfeste. Al concurs, laurè fora dal Heimatpflegeverband por l’ann iubilar 09 à tut pert 3500 jogn y jones. Le presidënt dla Provinzia Luis Durnwalder, l’assessuria Sabina Kasslatter Mur, l’assessuria dl Tirol Beate Palfrader y l’assessur dl Trentin Franco Panizza à premié i mius ogadus singui y i mius teams.

USP – Na delegazion de studënc rumanc dai Grijons dla Svizra anconta chisc dis la scola ladina. Tla Cësa provinziela Widmann a Bulsan à l assessëur Mussner y l ntendënt Verra inier juebia (7 mei) prejentà ravises y situazion atuela de nosta scola paritetica.