Atualità

USP - Tl ann de scola 2008/09 iel tla Provinzia de Bulsan 77 scoles autes, cun de ndut 19.396 mutans y mutons. 1.041 sculeies à chëst ann messé fé do na tlas; la perzentuela media ie de 5,4%, tla scoles ladines iela de 6,6%. De duc i sculeies se à 1,9% scrit ite te na scola auta paritetica ladina. La cumpëida de sculeies zënza zitadinanza taliana ie de 1.036, che fej ora 5,3 sun 100 scric ite. Tla scoles autes ladines iel 3,0% di sculeies nia de naziunalità taliana. Chësc vën fat al savëi dal Istitut provinziel de statistica Astat.

USP - Danter la Ladinia y la Rumantschia iel unì metù a jì n cuntat nuef, n fil culturel che dëssa tres internet judé a svilupé cuntac danter i doi raions dala medema ravises. La plata internet Filcultural.info prejënta la doi realteies, mostra paraleles y pieta ucajion de paredlé.

USP – Rosmarie Crazzolara da S.Ciascian ie unida numineda ispetëura nueva dla Scoles ladines. La nomina da pert dl ntendënt Roland Verra vëija dant chësta ncëria cun scumenciamënt de setëmber 2009.

USP – La zità de Zhangjakou cun cin milions de abitanc tl nord dla Cina à nteres per l savëi n cont dl turism da inviern tl Südtirol. Argumënc dl’ancunteda danter la delegazion dala Cina y l Presidënt Durnwalder, nsëira (9 merz) ie nce stata l’agricoltura, l sistem de furmazion y l autonomia dla Provinzia de Bulsan.

USP – L Ufize provinziel per apalc mostra su na statistica de marueia: tl ann 2008 ie passa 96% di apalc jic a firmes da tlo. N cont di custimënc ie l 86 percënt restà tl Südtirol. “La zifres mostra che son sun la drëta streda” dij l assessëur Florian Mussner.

USP – La Jonta Provinziela uel sparanië burocrazia te chëla che l dëssa unì fat nchin a 30% de manco delibres. Chësc sarà mesun tres chëla che i assessëures possa fé decrec aldò dla normatives metudes dant. Tla senteda da ncuei (9 merz) iel danterauter nce unì tratà l cunsëi de aministrazion dl IPES, l finanziamënt sëuraprò per l tunel dl Prëner y i tieres salveres tl Parch naturel dl Stelvio.

USP – Nchin ai 31 de merz possa patrons y aministradëures de archifs privac y de dlieja damandé n cuntribut provinziel per l mantenimënt o l miuramënt. De cumpetënza ie l Archif provinziel.

USP – N var de gran mpurtanza che fova bele giut debujën vëija l presidënt dla provinzia Durnwalder la dezijion dl Guviern a Roma de purté inant la ratificazion di protocoi dla Cunvenzion dl’Elpes. “Drucon bele giut de chësc viers ajache l protocol n cont dl muvimënt sun streda ie de gran mpurtanza per l Südtirol sciche raion de transit” dij Durnwalder.

USP – I Istitut de statistica Astat à ncuei (4 merz) dat ora na publicazion cun na lingia de dac y ndicazions sun l muvimënt sun streda tl Südtirol (cëla comunicat a pert). La nfurmazions reverda l ann 2007 y ie n cont dl trasport publich l’a nfurmazions plu realistiches dan la ntroduzion dl abunamënt debant.

L Istitut provinziel de statistica ASTAT à dat ora na publicazion de nfurmazions statistiches sun la mubilità y l trafich tl ann 2007 cun nce mo d’autri aspec che toca leprò. Tla stazion nueva per cumpedé l muvimënt sun la streda MeBo a Frangart an arjont cun 37.032 mesuns al di, l majer muvimënt de duta la Provinzia. Sun la streda S.S. 38 cumporta l culegamënt prinzipel per arjonjer Bulsan. Nce la streda dl Prëner (S.S 12) porta n gran muvimënt, la majera cumpëides ie tlo unides arjontes a Steinmanwald cun 22.903 mesuns al di y a Kardaun Nord cun 18.344 mesuns al di.