Atualità

USP – La Jonta provinziela de Bulsan à dat pro la carateristiches tecniches di lëures de miuramënt dla streda a La Val. Danter Pidro y la frazion Lé uniral slargià la streda, miurà la raides y mplu uniral nce fat n tretuar. “Chësc lëur purterà plu visibilità a chëi che furnea y plu segurëza a chëi che va a pe” spiega l assessëur Florian Mussner.

USP - L Ntendënza per la Scoles Ladines, deberieda cun la Lia Culturela Fanes y la Consulta Ladina a Bulsan prejenta na publicazion nueva de materiai per la scoles dal titul “Lijëndes y cianties”.

USP - Cun l segondo fin dl’ena de dezëmber va n drova i orars nueves da d’inviern per l trasport publich dla Provinzia de Bulsan. L assessëur Thomas Widmann à prejentà la nuviteies cun danora la ferata nueva tla val de Puster. I fins de Widmann per l daunì ie de plu stabilità di orars y uni mes’ëura n trasport ntan i mumënc de majer bujën.

USP – La segonda cumiscion provinziela per la defendura dla cuntreda à dat pro de lascé fé lëures pra l purtoi „Dolomiti“ sun Piz Sella. L proiet tl Chemun de Sëlva vëija dant de splané ora pertes dl purtoi. L proiet mandà ite dala sozietà „Piz de Sella AG“ vëija dant de spusté de ndut 9.365 metri cubich de tiera sun l purtoi danter la stazion a mont sun Piz Sella y la utia Comici.

USP – La deponia dal refudam che i Carabinieri à chisc dis abinà sun Secëda ne ie nia tl Parch naturel Puez-Odles. Chësc vëniel sorissà tl Ufize provinziel per i parcs naturei. L giavé ite refudam ie purempò da cundané, vëniel tenì prejënt tl ufize provinziel.

USP - L proiet per mëter a post la cuestion dl ngrandimënt dla utia Las Vegas tl chemun de Badia ie ncuei (25 nuvëmber) unì tratà dala Segonda cumiscion per la defendura dla cuntreda. La cumiscion provinziela se damanda vel cundizions dan dé pro l proiet.

USP - Jì inant cun la culaburazion danter la Provinzies de Bulsan y Belun, dantaprima tla mobilità, cultura y nfrastrutures. Chësc à l presidënt Durnwalder ncuei (25 nuvëmber) segurà a Bulsan al presidënt dl Belun Sergio Reolon. Argumënt de culaburazion ie nce la grupa de rujeneda ladina.

USP – Aministradëures y tecnics se à ncuei (25 nuvëmber) ancuntà per stlarì i particuleres dl cuncors scrit ora per na streda de zircunvalazion per Sëlva. Tla Cësa de cultura de Sëlva iel unit adalerch passa 80 persones che à mustrà gran nteres per l cuncors. “L cuntat persunel cun i tecnics juda dassënn a arjonjer la miëura soluzion al gran problem dl trafich te Sëlva” sorissea l assessëur ala stredes Florian Mussner.

USP- La Jonta provinziela de Bulsan à ncuei (24 nuvëmber) dat pro de lascé fé de pitla ativiteies produtives ti cuatieres. L zaré ju y fé su dan nuef na cësa cun cuatieres vën n cont di cuntribuc cunscidrà n ressanamënt. Ala pitla majons per mëndri ti hotiei possel unì fat na porta per les spartì dala majon di gentiores. Chisc ie stai i argumënc de majer ntres che l Presidënt dla provinzia Durnwalder à prejentà ala stampa.

USP – Pra la premiazion dl cuncors de leteratura „Auturs ladins scrì...“, n sada sëira a Urtijëi, iel nce unì prejentà l liber di pec che à venciù l cuncors. Iaco Rigo y Ivan Senoner à pudù pië do dala mans dl assessëur provinziel Florian Mussner l prim pest y truepa laudes. Na bela cumpëida de publich à mustrà gran nteres per l’opres nueves scrites tla rujeneda ladina.