Atualità

USP - Le forum cultural ladin che vëgn organisé anualmënter, é chësc ann gnü tignì ai 28 de otober a La Pli de Mareo cun le tema dediché al teater. Al é gnü baié dles condiziuns speziales, sot a chëres che le teater ladin se svilupëia y vëgn portè dant. L’assessur ladin Florian Mussner à sotligné l’importanza dl teater ladin por la cultura ladina.

Le forum cultural sön le teater ladin vëgn mëtü a jì dal Assessorat Provinzial y dala Consulta Ladina. Dötes les rapresentantes y düc i rapresentanc dles lies ladines y di comuns y chi che é interessà, é invià a chësta manifestaziun. Ala discusciun tolarà pert jënt che laora por le teater ladin y l’Assessur por la cultura ladina Florian Mussner.

LPA - Le Presidënt dla Junta provinziala Luis Durnwalder y l’assessur ladin Florian Mussner à daurì incö jöbia, ai 5 de otober, le Dé dla Cultura Ladina. Deperpo che l’assessur Mussner à anunzié n engagement plü sterch dla Provinzia tl sostëgn dla leteratöra ladina, à le Presidënt dla Junta provinziala confermè, che tratan le renovamënt dla convenziun cun la RAI, damanaràl plü na gran lerch por la programaziun locala tl lingaz ladin.

Le sorvisc dles insegnantes y di insegnanc gnarà aprijé sura döt le monn ai 5 de otober, le dé internazional di insegnanc. Ince l’importanza dla formaziun gnarà metüda tl interès dl publich. L’assessuria provinziala por la scora Luisa Gnecchi y i assessurs provinziai por la scora Otto Saurer y Florian Mussner tol chësta oportunité por sotligné l’importanza di insegnanc de dötes les scores y dles gradaziuns dles scores sciöch’ince dles assistëntes pedagogiches y de chëres che laóra tles scolines.

LPA – Plü saurides gnarà fates döes pistes tl comun de Sëlva. Ara se trata dla pista de Ciampinoi y tla Val Longia. La secunda comisciun dla sconanza dl ambiënt à aprovè inier (dedolönesc, ai 3 de otober) i proieć presentà dales sozietês de furnadoies competëntes.

LPA – Le proscimo dedolönesc, ai 26 de setëmber se rodarà döt incër l’Europa. Tla academia europeica (EURAC) vëgnel organisé por le dé europeich di lingać dales 9:00 ćina les 17:00 na gran manifestaziun europeica, olach’al tolarà pert scolars dles scores altes, insegnanć de dötes les scores, direturs y geniturs interessà. I organisadus de chësta scomenciadia é i trëi ofizi dles scores sciöch’inće Europe Direct dla repartiziun dles chestiuns europeiches.

LPA - Al è incontestè, che por le mantegnimënt de süa cultura y por se svilupé inant adora les mendranzes linguistiches n so sistem scolasich. La storia dl sistem scolastich, dla plö picera mendranza te nosta provinzia, i Ladins, vëgn descrit te na nöia publicaziun. Le liber dè fora dal Ofize por la Cultura y Scora Ladina vëgn presentè in vëndres, 29. de setëmber 2006, cun la presënza dl’Assessur Florian Mussner a La Plì de Mareo.

USP - Dai 17 ai 22 de setëmber se abinerà tla sënta dl Istitut Pedagogich Ladin y dla Ntendënza Ladina a Bulsan 20 nsenianc y nseniantes da de plu pertes dl’Europa. L fin ie n curs de furmazion per nsenianc che lëura te raions cun plu rujenedes y leprò na rujeneda de mendranza.

USP - En jöbia che vëgn, ai 8 de jügn 2006 deponarà le Presidënt dla Provinzia Luis Durnwalder y l’assessur Florian Mussner la pera de fondamënta por la ciasa di studënc “Assudëi” a Urtijëi.

Per l cumplì di 250 ani de W.A. Mozart dëssa duta la scoles ladines giaté coche scincunda l’opera ntiera de Mozart, l cumpositëur che vën suënz descrì coche l artist musichel plu genial de duc i tëmps.