Atualità

Le salf protezionè por porsones cun bojëgns particolars tla ciasa “Locia” tl zënter de Urtijëi po gnì restrotoré. Le comitê tecnich provinzial à autorisé inier, lönesc ai 22 de novëmber la restrotoraziun proietada y l’ampliamënt dla strotöra.

Tröpa jënt à tut pert ala sëra de letöra y discusciun cun l’auturia Maria Pedevilla y l’autur Ivan Senoner che la Repartiziun provinziala Cultura Ladina à metü a jì l’edema che é stada a La Ila. La proscima sëra de letöra d’autur gnarà tignida en jöbia, ai 25 de novëmber a Urtijëi.

Ince en chësc ann gnaràl tignì ai 20 de novëmber sura döt le monn le “Dé internazional di dërc dl’infanzia”. Chësc dé se basëia sön la Convenziun internazionala aprovada dal’Adunanza dles Naziuns Unides ai 20 de novëmber dl 1989 tla cité de New York. Cina sëgn é la Convenziun gnüda ratificada da 190 paîsc dl monn, tolon fora i Stac Unis y la Somalia.

34 insegnantes y insegnanc dla scora elementara y mesana dles valades ladines à tut pert al scioper nazional protlamè incö lönesc, ai 15 de novëmber 2004. “Tles scores altes n’él stè degügn insegnanc che à tut pert” à lascè al savëi l’Intendënza ladina.

USP - La Repartiziun provinziala Cultura Ladina mët a jì ai 18 de novëmber a La Ila y ai 25 de novëmber a Urtijëi döes sëres de letöra olache i auturs ladins che à davagné le concurs leterar “Auturs ladins scrî ...” liarà dant sües cunties. Dötes les porsones interessades é sambëgn inviades a tó pert.

USP - “No” al’Alemagna y “scê” ala colaboraziun tl ciamp cultural y dl trafich: chisc é en cört i resultac dla incuntada dl Presidënt dla Provinzia Luis Durnwalder cun le Presidënt dla Provinzia de Belun Sergio Reolon ai 3 de novëmber a Balsan.

USP - Proiec por y cun la jonëza tles valades ladines de Südtirol é stà l’argomënt prinzipal dla sentada dla consulta ladina dles jones y di jogn che é gnüda tignida en mercui a Urtijëi. La presidënta Michaela Taibon à fat n valgönes propostes de proiec da realisé: tla Val Badia déssel gnì invié ia n proiet de barat cultural cun jones y jogn tl’Uniun Europeica y te Gherdëna déssel gnì metü a jì n bus da de nöt. L’ofize provinzial laûr por y cun la jonëza programëia implü da realisé n valgönes trasmisciuns ladines por la jonëza.

USP - La Repartiziun provinziala Cultura Ladina mët a jì ai 18 de novëmber a La Ila y ai 25 de novëmber a Urtijëi döes sëres de letöra olache i auturs ladins che à davagné le concurs leterar “Auturs ladins scrî ...” liarà dant sües cunties. Dötes les porsones interessades é sambëgn inviades a tó pert.

USP - Te n valgügn dis podarà l’auturia ladina Rut Bernardi pié do le pest „Walter von der Vogelweide“. L’Assessur provinzial Florian Mussner ti fej porchël les mius audanzes y lalda l’auturia por so impëgn por la cultura y le lingaz ladin.

USP - “La scora tles valades ladines y süa storia é na pert importanta dla cultura ladina y de chëra de Südtirol” à alzè fora l’assessur provinzial Florian Mussner pro le dé dla cultura ladina tignì incö a Balsan. La storia dla scora ladina é stè l’argomënt prinzipal dla manifestaziun a chëra ch’al à tut pert rapresentantes y rapresentanc di comuns, dles istituziuns, dla scora, dla scolina y de d’atri ambiënc culturai de trames les valades ladines.