Atualità

Dal’eletronica al nglëisc, nchin al prim aiut ie duta la pusciblteies de furmazion prufesciunela pra la scoles prufescioneles da abiné te n cudejel nuef. Chësc ie unì dat ora dala Ripartizion provinziela per la furmazion prufesciunela tla rujenda ladina y tudëscia. Da n struf ie l cudejel da giapé te duta la scoles prufesciuneles.

La sajon da inviern 2003/04 tl Südtirol, da nuvëmber 2003 nchin auril 2004, ie stata da record. L ie unì cumpedà 1.987.671 persones che ie ruvedes adalerch y 10.172.174 nuetes afitedes. Ntan chisc sies mënsc iel per l prim iede unì passà via la 10 milions de nuetes afitedes. Permez al medem tëmp dl ann passà an arjont n aumënt de 6,6% pra la persones ruvedes adalerch y 4,7% pra la nuetes afitedes. Chësta y truepa d’autra nfurmazions publichea l ASTAT te si plata de nfurmazion „Fremdenverkehr in Südtirol - Winterhalbjahr 2003/04“.

USP – Bën 21 proiec a ncuei mierculdi 24 de agost, tëut tres la Sgonda cumiscion provonziela per la defendura dl ambiënt a Bulsan cun si presidënt Adriano Oggiano. Danterauter iel unì dat pro de curì prò la utia sun Col Pradat a Corvara.

USP - La scola ladina y si particulariteies sarà n vënderdi ai 3 de setëmber 2004 l argumënt zentrel dl cunvëni a Urtijëi. L assessëur ala scola y cultura ladina Florian Mussner rujenerà ala maestres, ai maestri y ala persones respunsables dla scola.

Tl’ena danter l 23 y l 27 de agost 2004 tenirà i culaburadëures di ufizies provinziei per l artejanat udienzes tla sëntes destachedes.

Dla 383.100 persones sëura 15 ani tl Südtirol iel al sumenciamënt dl ann 2004 stat 226.600 despostes a lauré. L 98% à n lëur y l 2% chir da lëur. Gran pert lëura tl ciamp di servijes (63%). Chisc ie i resultac dl’ultima nrescida dl ASTAT sun la persones tl lëur. Sce n ti cëla a duc i trimestri dal scumenciamënt dl 2000 vëijen che la cuota de chëi che davania ie aumenteda da 68% a 72%, la cuota dla persones zënza lëur ie te chësc tëmp resteda ntëur i 2,5%.

USP – Ntëur 1.000 ie stai i vijitadëures dl Museum Ladin a San Martin de Tor a udëi la figures de bront de Richard Agreiter. La mostra dla scultures de bront „Mister dla froma“ ie mo da udëi nchin n dumënia ai 22 de agost 2004.

USP – De sustëni y regulamentazion dl’economia tratova n di de tlausura tenì te Gherdëina dal Assessëur provinziel al’economia Werner Frick y i dirijënc dl Assessorat per l’Economia y Finanzes. Per d’autonn ulëssen bele pruté dant de plu prupostes de lege.

USP – La particulariteies dla natura y dla cuntreda ntëur a Zans tla valeda de Funes possen damoinla udëi dal troi nuef dla natura. Chësc troi ie nce da ti ruvé permez per la persones sun n stuel da rodes. L presidënt dla Provinzia Luis Durnwalder y l assessëur Michl Laimer giaurirà ufizialmënter l troi dla natura metù a ji tres i ufizies Parcs Naturei y per l’Aministrazion Furestela, n vënderdi ai 20 de agost 2004 dala 11 danmesdi a Zans.

USP - Gran suzès pro les porsones dl post y foresti à albü la manifestaziun sön le monn dles liëndes ladines mëtüda a jì tles ultimes dös edemes dal Assessorat provinzial por la Cultura ladina.