Atualità

USP – I formulares per la detlarazion nueva per nia messei paië l tichet possa sën nce unì desciariei dal internet. La vedla detlarazions ie tumedes cun l prim de agost 2004.

L’età media dl ël, che se marida (l prim iede) fova tl ann 2003 aldó dl Istitut de statistica ASTAT de 33,6 ani. Pra l’ëila ova n media 30,6 ani. Ntan l ann 2003 se à spartì 641 peres, l 60% cun un o doi mutons. I peres zënza mutons fej ora l 30%. Dal ann 1975 ie la cumpëida di devorziei belau aumenteda de trëi iedesc, tl ann 2003 iel tl Südtirol stat 368 caji devorziei.

USP – L Museum Ladin Ciastel de Tor mostra duman, merdi 10 de agost 2004 dala 21.15 l pez „semi de na nuet de instà“ te doi rujenedes de Wiliam Shakespeare. L se trata de na produzion la lia culturela ErehwoN, cun la creazion musichela dl cumponist Alessandro Trebo de S. Martin de Tor.

USP – La presentazion dla Ripartizion provinziela dl personal tl internet ie unida fata da nuef n cont de grafica y de cuntenut. Sun la plates fates da nuef iel da abiné nfurmazions sun la puscibiliteies de lëur, stieres liedies tla Provinzia, dumandes, graduatories, cuncorsc de lëur y l regulamënt de personal. L assessëur per l personal Thomas Widmann ie dla minonga che sce n adrova bën la tecnologies nueves possen arjonjer n mieur cuntat cun la populazion y smendrì la burocrazia.

Chëst’ ena che vën, dai 9 nchin ai 13 de agost 2004 tën l’aucat populer de plu udienzes.

USP – N sada 14 de agost uniral a Valdaora fat la jita - quiz tl Parch naturel Fanes – Sennes – Braies che fova unida desdida de lugio per l bur tëmp. Te chesc quiz se tratla de savëi y de ti avëi l fortl a fé juesc che vën fai sëuraprò ala dumandes sun natura, cuntreda, cultura dl luech y usanzes. Sibe granc che pitli possa fé pea chësta jita – quiz. L unirà muet dala 12.30 nchin ala 14.00 pra la ustaria „Panorama“ a Valdaora ulache n pudrà pona nchin ala 16.15 inò de jù la dumandes dl quiz.

Tl mëns de juni ne se à l aut dl’Azores nia pudù fé inant. Tl Südtirol iel stat vel dis de bel tëmp cun la prescion auta, che ie for inò unic fermei da masses de aria frëida dal nord. Purempò ie la temperatures states plu autes dla media.

USP – Da permò fej l diretëur dl Istitut Pedagogich Ladin, Theodor Rifesser pert dla Jonta dla Università liedia de Bulsan. Per pudëi to ite n rapresentant dla grupa de rujeneda ladina iel stat debujën de fé na mudazion dl statut cun n bensté da Roma. L ie mpurtant che i Ladins sibe nce rapresentei ti organs esecutives de istituzions mpurtantes, à dit l assessëur ladin Florian Mussner cun sodesfazion.

USP – L assessëur Florian Mussner se à inier domesdi, juebia 29 de lugio, ancuntà a Bulsan cun l cunselier provinziel trentin Luigi Chiocchetti. I doi rapresentanc ladins à rujenà sun la situazion atuela dla grupa de rujeneda ladina tla doi provinzies Bulsan y Trënt. Aldó de tramedoi rapresentanc ie l’ancunteda stata n var inant per na culaburazion che va inant sun basa istituzionela.

USP – Ndut ie 152 persones zapedes ite ntan l ann 2004 tla pension ulentera per la ciasarines, aldò la lege regiunela nr. 3/93. Tl ann 2003 se ova scrit ite 124 persones. Chësta zifres ie unides comunichedes dal Ufize provinziel per preudënza soziela, do che la lege finanziaria regiunela, cun l to demez dla pension dla ciasarina, ie jita n drova.