Atualità

USP – I diretëures de Ufize cumpetënc dla Provinzia à dat na valutazion positiva n cont dl dann ambientel a proiec sun purtoies dai schi tl Chemun de Badia y Corvara.

Chëst’ ena che vën, dai 28 de juni nchin ai 2 de lugio 2004 tën l’aucat populer de plu udienzes.

Aldò dl Istitut provinziel de statistica ASTAT iel ti servijes saniteres dl Südtirol ntan l ann 2003 uni fermà 525 gravidanzes. Paredlan al ann 2002 iel tl Südtirol stat n aumënt dl fermé ulenter dla gravidanza dl 6%. 143 caji de fermé la gravindanza fova l ann 2003 pra ëiles fulestieres. N ralazion a duta l’ëiles che à fermà de si bona la gravidanza, fovel 27% ëils fulestieres, permez ai 24% tl ann 2002.

L mëns de mei ie tl Südtirol ie unì caraterisà da n tëmp cun truepa mudazions y cun truep dis da terperatures basses ajache l aut subtropich dl’Azores ne se à nia slargià ora sëura l’Europa sciche l ann passà. Dantaldut tla prima pert dl mëns à l aria frëida dal nord purtà plu suvënz truepa nëif ti crëps.

ast - N auter ann d’autonn saral sun Plan da Tieja, tl Chemun de Sëlva, la scola mesana per i doi luesc: per Sëlva y S.Cristina. Chësc ie unì comunicà inier domesdi, merdi 22 de juni, dal Assessëur Florian Mussner ai ambolc, assessëures ala scola y diretëures de Gherdëina. Tl’ancunteda a S.Crestina iel nce unì rujenà dla strutura nueva per la scola auta Raetia a Urtijëi che n ulessa scumencé a frabiché d’autonn y dla cësa di studënc che ruva te si ultima pert de proietazion. Presënc fova nce l Ntendënt Verra y l diretëur de ripartizion Prinoth.

USP – Tla scoles elemeteres ladines vëniel da chësc autonn scumencià a mëter n drova la reforma scolastica cun de pitli vares de prova. La Jonta provinziela à inier lunesc, 21 de juni, dat pró la pruposta dl assessëur Florian Mussner che vëija dant l’urganisazion, aspec didatics y pedagogics per i vares de prova. Argumënc zëntrei ie l portfolio de valutazion, l miuramënt dla cumpetënza linguistica tres prim vares de na didatica integreda de rujeneda y l nseniamënt dla nfurmatica.

Te si otava edizion presenta l rendicont dl’Aministrazion dla Provinzia de Bulsan chël che l ie unì fat y arjont ntan l ann 2003 per la populazion. L ie da pudëi liejer la scumenciadives per to demez burocrazia, miuré l’efiziënza y l ti vester daujin ala jënt, nsci schiche la maniera co che ie unic adurvei i scioldi publics. L rendicont ie da giapé tl Ufize stampa dla Provinzia o tl internet sun la plata http://www.provinz.bz.it/taetigkeitsbericht2003.

USP – Jëuni possa fé la patent per l motorin tres la scola, te na scola dl avisé o sciche privatist. Per almanca 20 nteressei, vëniel metu sù na cumiscion de ejam dal Ufize provinziel per la patent.

USP – La streda dla Val Badia unirà da nsnuet, vënderdi 18 de juni inat, giaurida ai auti ntan l fin dl’ena dl 19 y 20 de juni. Da s’ën inant iel udù danora de giaurì la streda bas ite uni fin dl’ena nchin ala giaurida ufiziela per la sajon auta. Nuef iel nce che la streda ne vën nia plu s’areda de nuet y nsci possa auti y mesuns pesoc passé sun 24 ëura.

Tl’ena danter l 21 y l 35 de juni 2004 tenirà i culaburadëures di ufizies provinziei per l artejanat udienzes tla sëntes destachedes.