Atualità

Usp – N proiet particuler per la mediazion de personal dal Deutschland per la sajon da instà tla gastronomia dl Südtirol vën metù a ji tla Scola prufesciunela "Savoy“ a Maran. L fin de chësta scumenciadiva nueva dl 3 y 4 de mei 2004 ie chël de ti mëter a ji a dut l personal nteressà n cuntrat de lëur cuncret y ala firmes nteressedes la jënt che i chier.

Usp – I tecnics respunsabli y i rapresentanc dla firma che lëura per la streda nueva dla Val Badia à ncuei merdi, 6 de auril valutà la situazion atuela di lëurs y de segurëza. Gran dificulteies cumporta al mumënt la cundizions metereologiches. Na grupa de vint esperc analisea y segurea sën l crëp pra la streda. Ntan Pasca resta la streda dla Val Badia desareda.

Usp – L abiné na luegia de albierch ntan l tëmp de studio cumporta suvënz na gran dificultà. Tl Südtirol iel unì metù sù de plu cëses per studënc che vën presentedes tl cudejel nuef dat ora dal Ufize Provinziel per Assistënza Scolastica y Universitera.

Nchin ai 9 de auril 2004 tën l’aucat populer de plu udienzes.

L’Assessorat provinzial por la cultura ladina va inant cun i cursc de ladin dla Val Badia sia por i nia ladins co por i ladins. Dai 4 de mà 2004 inant vëgnel porchël indô pité cursc dagnora tla sënta dl Ofize cultura y scora ladina a Balsan.

Aldò dl ASTAT iel tl mëns de fauré 2004 unit a se l dè n aumënt dl 16,0% pra i fulestieres che ie ruvei adalerch y n aumët de 14,8% pra la nuetees afitedes permez al medem mëns tl ann passà. Turisc’ dal Deutschland à curì l 45,8% dla nuetes y à arjont n aumënt de 23,1% pra la nuetes afitedes. La prima zifres dla sajon da inviern 2003/04 (da nuvëmber nchin fauré) mostra n aumënt de 14,5% pra chëi che ie ruvei adalerch y n +9,2% pra la nuetes, permez al medem tëmp tl ann passà.

Usp – I rapresentanc dla lies cultureles sëuracumeneles de majera mpurtanza y la Uniun Maestri Ladins de Badia à l’ena passeda ancuntà l assessëur ladin Florian Mussner. La prioriteies dl’atività culturela dëssa tl proscimo tëmp ti ji ala sënta nueva per la lies cultureles sëuracumeneles, plu tëmp de trasmiscion tl radio y televijon ladina, la cumiscion per la furmazion di nsenianc ladins, la sënta destacheda dl Istitut Pedagogich Ladin tla Val Badia y la discuscion de basa sun la scola ladina.

LPA – Barbara Tavella che à venciù l cuncors per artisc jëuni ladins „Premia flus d’aisciöda“ ie ncuei, mierculdi 31 de merz unida premieda a Bulsan dal assessëur ladin Florian Mussner. Ad’ëila ti vëniel dat la puscibltà de mëter ora si lëures a Bulsan. A chësta maniera giapa Tavella la puscibltà de lascé udëi si lëures y nsci n pue’ de ert ladina a n majer publich, à dit Mussner.

USP - L’assessur ala scora ladina Florian Mussner à incuntè l’edema passada la comisciun por l’intregraziun dla direziun raionala de Badia sön invit dl diretur Otto Moling. Al vëgn damanè almanco le medem numer de insegnanc de sostëgn co l’ann passè, i problems cun l’integraziun aumënta da ann a ann.

Usp – Nsci sciche ti ani passei possa i studënc nce chëst ann damandé n cuntribut per curì la spëises de viac. La cundizion ie la iscrizion per chëst ann pra na università o pra na scola speziela ora dl Südtirol, tla Talia o te paejes de rujeneda tudëscia. La proscima scadënza ie l 30 de auril 2004, l’ultima puscibltà de fé dumanda toma ai 31 de agost 2004.