Atualità

Tl ann 2003 ie la nflazion ufiziela ruveda a na perzentuela de 2,6% tla Talia y a 2,8% tla zità de Bulsan. La nflazion de media pra la families de lauranc y dependëc (FOI), fova tl medem tëmp a Bulsan y te duta la Talia de 2,5%. Chisc valores ie da liejer do tl’ultima comunicazion dl Istitut Provinziel de Statistica (ASTAT), ulache l vën nce spliegà plu avisa.

USP - En mercui, ai 31 de merz, dales 11.00 danmisdé, tla curt interna dl Palais Widmann a Balsan, premiarà l’Assessur ala cultura ladina, Florian Mussner l’artista Barbara Tavella da La Val, davagnadëssa dl pröm concurs por artistes y artisc jogn dles valades ladines „Premia flus d’aisciöda“ scrit fora Assessorat ala scora y cultura ladina.

Tl’ena danter l 29 de merz y l 2 de auril 2004 tën l’aucat populer de plu udienzes.

Usp - I rapresentanc dla lia di artejans (CNA/SHV) se à chëst ena ancuntà cun l assessëur ai lëures publics Florian Mussner. Dantaprima iel unì rujenà de culaburazions per l daunì.

USP - En lönesc, ai 29 de merz gnaràl metü man i pröms laûrs por la costruziun dl punt “Cor” a Piculin. Por podëi garantì la viabilité gnaràl impröma arjigné na deviaziun provisora.

Usp - L Museum ladin Ciastel de Tor se presënta nce chëst ann cun n gran program de ativitieis. Una dl’atrazions plu nteressantes ie la prima edizion dla mostra culturela „Trienale Ladina“. L diretëur dl museum Stefan Planker y l presidënt Heinrich Huber à presentà la nuviteies a Bulsan.

Usp – Per rujené sun l daunì dla scola ladina se à l assessëur Florian Mussner da permò ancuntà cun i diretëures dla scoles ladines a Al Plan. N ie stai duc a una che la scola ladina avrà bon daunì.

Usp – Dla Dolomites y la cater stredes di jëufs te chësc raion se tratovla pra l’ancunteda de n merdi 23 de merz a Bulsan danter l assessëur Florian Mussner, l presidënt dla Provinzia de Belun Oscar Di Bona, l assessëur al muvimënt sun streda de Trënt Silvano Grisenti y rapresentanc di chemuns y dl ciamp turistich. La Dolomites ne dëssa nia deventé n museum gratis cun stredes da transit, foven a una. L di per chëi dala rodes dle lugio, ulache la stredes di jëuf unirà dsaredes ai mesuns a motor, dëssa simbolicamënter sorissé l valor dla Dolomites y de si natura.

Cun l ngrandimënt dla utia sun Piz Setëur tl Chemun de Sëlva y n mplant da sprizé ega a Latzfons y Feldthurns se à ncuei merdi dat ju la Sgonda cumiscion per la defendura dl’ambient te si senteda a Bulsan. Per l ngrandimënt tla utia sun Piz Setëur ne iel nia unì dat l bënsté. A n valguna cundizions se à la cumiscion desmustrà a una per i mplanc da sprizé ega.

USP – L diretëur dla scola auta Raetia de Urtijëi, Alexander Prinoth ie l diretëur nuef dla ripartizion per scola y cultura ladina. Prinoth à venciù l cuncors publich y ie inier lunesc unì numinà dal Guviern Provinziel diretëur de ripartizion nuef.