Atualità

OSP - Na delegaziun basca è ruvada inier, mertesc dômisdé, sön Ciastel de Tor a San Martin por vijité le Museum Ladin. La delegaziun, cun a cé le presidënt dl Parlamënt basch Juan Maria Atuxta Mendiola, adüm rapresentanc Gorka Knörr Borràs y Carmelo Barrio Baroja, ai mëmbri dla Junta Manuel Huertas Vicente y Kontxi Bildbao Cuevas cun en valgügn funzionars dl Parlamënt basch, è chîsc dis tla nosta provinzia por inrescí les carateristiches dl’autonomia de Südtirol.

OSP - Ti ultims mëisc él gnü constatè plö iadi defec y fai tles costruziuns publiches. Gonot an podü baié cinamai de fortüna sce porsones ne s’á nia fat en mal. Dan da en valgünes edemes él tumè jö le plafonn tla Ciasa di jogn „Kassianeum“ a Porsenú. Ince tl zënter sozial “Trayah“ a Bornech él tumè jö en plafonn.

OSP - En vëndres, ai 18 d’otober, él gnü a na incuntada tröc geniturs y insegnanc; tla Scora mesana da La Ila por baié di aspec dla reforma nazionala dla scora. Tröc orô ince savëi deplö sura le dagní dl lizeum a La Ila. L’incuntada é gnüda metüda a jí sön invit dl Presidënt dla Consulta provinziala di geniturs Nando Agreiter.

OSP - Incö daduman s’á l’assessuria provinziala al laûr, Luisa Gnecchi, adüm al diretur de Repartiziun, Helmuth Sinn, incuntè pro le Ministêr dl Laûr cun le responsabl dl Sorvisc imigraziun dot. Silveri, cun chël che al gnü tratè le tem dl assegnaziun dles cuotes de lauranc foresti in basa al Decret di flusc aprovè le 17 d’otober dl ann passè.

OSP - Incö vîr 58 studënc de Südtirol, nanter chîsc ince tröc ladins, ti cunvic dl „Akademikerhilfe“, üna dles plö granes organisaziuns de cunvic austriacs. L’assessuria provinziala al istruziun, Sabina Kasslatter Mur y le secretêr general dl “AkademikerInnenhilfe“, Sepp-Gottfried Bieler, á tl ultim fin dl’edema ejaminé le contrat nü y verifiché sce la cuota di posc ti cunvic por i studënc de Südtirol pò ince gni slariada fora.

OSP - L’Ufize distrec sanitars dl Assessorat ala Sanité realisëia vigni mëis na seria de brosciüres: le nono de chîsc trata le tema: “Distimia: che cos’è?” - "Dysthymie: Was ist das?".

OSP - Chilò dessot na lista atualisada de düc i posc de laûr resservá al grup etnich ladin tl’aministraziun publica.

OSP - Dai 19 ai 24 de nuvëmber uniral metù a jì a Urtijëi l’ancuntedes de furmazion y la mostra dla figures animedes per mutons "Gibì y Doppiaw".

OSP - Les novitês sön l’utilisaziun dles eghes, la cherta dles funtënes te Südtirol, stlarimënc söl ega da bëir: chîsc é en valgügn di tröc dac plö importanc ch’é sëgn da ciafè söla plata internet nöia dl Ufize provinzial por l’anuzamënt dles eghes.

OSP - Da mez otober él ufizial: la biscia tiroleja foscia-rossa é gnüda reconosciüda dala Uniun Europeica sciöche raza manaciada da morí fora. "Chësc ó dí che dal proscim ann pò düc i zidladus fá domanda de contribut de sostëgn por la suraviënza de chësta raza tipica de ciora", dij cun sodesfaziun l’assessur provinzial por l’agricoltöra Hans Berger.