Schule / Kultur | 28.09.2005 | 09:53

Urtijëi, ai 8 de utober: Forum culturel sun la leteratura ladina

USP - L forum culturel sun la leteratura ladina vën metù a jì dal Assessorat Provinziel y dala Consulta Ladina. Duc i reprejentanc y duta la reprejentantes dla lies ladines y di chemuns y duta la persones nteressedes ie nviedes a unì a chësta manifestazion. Ala descuscion tulerà pert autores ladins y ladines, l Assessëur ala cultura Florian Mussner y l Ntendënt Roland Verra.

Uni ann urganisea l Assessorat Provinziel per la Cultura Ladina y la Consulta Ladina n forum sun la cultura ladina. L argumënt dl forum de chëst ann ie la leteratura.
L Ntendënt Roland Verra nvierà via la manifestazion cun n referat sun “la situazion atuela dla leteratura ladina”. Sëuraprò menerà l dr. Lois Ellecosta na descuscion cun l Assessëur ala cultura ladina Florian Mussner, i autores Marco Forni, Georg Demetz, Giovanni Pescollderungg y l’autora Daria Valentin. La scola de mujiga de Gherdëina purterà pro a abelì l forum.
La manifestazion vën tenida n sada, ai 8 de utober 2005, dala trëi domesdi tl hotel “Grödnerhof” a Urtijëi. Duta la reprejentantes y duc i reprejentanc dla lies ladines, duc i ambolc, duta l’assessëures y i assessëures ala cultura y duta la persones nteressedes ie de cuer nviedes a chësta manifestazion. L lingaz dl forum sarà l ladin.

Duc i media ie nviei a tò pert a chësta manifestazion

n sada, ai 8 de utober 2005

dala 15.00

tl hotel “Grödnerhof” a Urtijëi.

USP