1. Home
  2. De dla porta daverta

De dla porta daverta

Palaz Widmann | Consëi provinzial | Autonomia y solidarieté | De dla trasparënza

Ai 5 de setëmber él le De dl’Autonomia. En chësc de dl 1946 á le presidënt dl Consëi talian Alcide Degasperi y le minister di Esters austriach Karl Gruber firmé le Tratat de Paris, olache la Talia se tol dant da conzede na potesté legislativa y esecutiva regionala autonoma por sconé les mendranzes che vir tl Südtirol. Le Tratat rapresentëia porchël le pröm vare devers l’autonomia d’aldedaincö. Le Tratat Degasperi-Gruber fej fora cun les 137 mosöres dl Pachet dl 1969 la fontamënta dl’autonomia. Dal 2014 incá anüza la Junta provinziala adöm cun le Consëi y al’Aministraziun provinziala l’ocajiun por presenté l’aministraziun, a na moda che la jënt interessada  pois odëi da daimpró olache y coche les chestiuns che la reverda vëgn laurades fora dal personal provinzial.

 

 

Palaz Widmann

Le Palaz Widmann dlungia le Consëi provinziala sará tl zënter dl De dla Porta daverta. En ocajiun dl De dla Porta daverta da iniann él gnü chirí fora sciöche tematica prinzipala la Solidarieté. Al gnará presenté les organisaziuns desvalies che laora tl ciamp dla solidarieté, dl volontariat y dla cooperaziun al svilup. Les tematiches é gnüdes partides sö aladô de döes prospetives:

Indöt tolarál pert söporjö 20 assoziaziuns che presentará dales 10 ales 18 na panoramica sön les ativités de volontariat, sön la cooperaziun al svilup y söi sorvisc soziai tla curt interna dl Palaz Widmann. Dales 10.00 gnarál daurí le De dla Porta daverta, dales 11.00 sarál spo döta la Junta che se presentará al publich tla curt interna, olache al gnará ince a se le dé la firma de n’acordanza Fair Trade, la presentaziun dl movimënt Fair Trade y di proiec de Rudi Dalvai y de Brigitte Gritsch.

Implü gnarál ince presenté la colaboraziun da de plü agn danter Provinzia y “CTM altromercato” tl contest de n marcé sostenibl y d’atri proiec desvalies. Dales 12.00 inant sarál spo poscibl da tó pert a vijites acompagnades tla secunda alzada de Palaz Widmann, olache al é le salf dles sentades dla Junta y l’ofize dl Presidënt dla Provinzia. Tratan la vijita gnarál splighé ince la storia dl Palaz y an podará ince vijité l’ofize dl Presidënt Arno Kompatscher, che sará ince tles vijinanzes por incunté i zitadins.

Dales 13.00 inant gnarál spo mostré films sön le volontariat y sön la cooperaziun al svilup tl salf stampa dla Provinzia.

 

Consëi provinzial

Tl Consëi provinzial, le majer organism rapresentatif y dezijional dla Provinzia sarál poscibl da ti ciaré ai vari de n dessëgn de lege cina al’aprovaziun dla lege instëssa. Le Consëi provinzial é na sort de laboratore olache al nasc idees y propostes por mioré la vita dles zitadines y di zitadins, olache al vëgn fat discusciuns y aprové leges y olache al vëgn surandé inciaries importantes. Le Consëi provinzial é formé da 35 aconsiadësses y aconsiadus. Do la lege é la dorada dl'inciaria dl Consëi  de cinch agn.

Tratan le De dla Porta daverta sarál insciö poscibl da vijité le Consëi provinzial dales 10.00 inant. Al gnará organisé n percurs tematich olache al gnará mostré le salf dles sentades y dles incuntades, i posć dles traduturies y di traduturs, le salf stampa, la tribuna por i ascutadus y tröp d’ater. Tratan le de sarál propi i aconsiadus y les aconsiadësses provinziales che presentará le percurs de formaziun de na lege provinziala.

Tla sënta dl Consëi provinzial él ince da ciasa la Garanta por l’infanzia, por la defenüda zivica, l’aconsiadëssa por l’avalianza dles oportunités, le Comité provinzial por les Comunicaziuns, l’Organism de Valutaziun y le Consëi di Comuns. Chëstes istituziuns independëntes presentará ince sües ativités.

Tl’alzada a tera sará poscibl da incunté aconsiadus provinziai, da curiosé tl plenum dl Consëi y ti atri salfs istituzionai. Tla pröma alzada podará i vijitadus ti ciaré ai Ofizi Chestiuns legislatives y iuridiches, an podará ince vijité i ofizi dl presidënt y dl vizepresidënt. Le Sorvisc stampa spligará sciöche ara funziona cun i rapresentanc di media y dles redaziuns TV, radio y di foliec. Tles atres döes alzades sarál spo i grups politics dl Consëi provinzial che spligará so laur, ci che al vëgn fat canche al ne é degönes sentades o sciöche an arjigna ca documënc da presenté spo.

Autonomia y solidarieté

En ocajiun dl De dl’Autonomia él la Provinzia che ó informé i zitadins sön l’autonomia y la solidarieté, sön l’importanza de aziuns de solidarieté y sön la gran richëza de scomenciadies che vëgn sostignides sura döt le monn. Tla curt interna de Palaz Widmann gnarál insciö presenté scomenciadies desvalies che reverda la solidarieté. Les tematiches é gnüdes partides sö alado de döes prospetives:

Implü sarál ince poscibl da s’informé sön scomenciadies de volontariat y di sorvisc soziai tl Südtirol.

Por savëi de plü sön le tema solidarieté


De dl'autonomia = De dla trasparënza

I Dis dla trasparënza toca pro les scomenciadies che la lege n. 190/2012 sön la prevenziun dla coruziun y le decret legislatif n. 33/2013 vëiga danfora en materia de trasparënza, por garantí n livel de trasparënza adaté, legalité y svilup dla cultura y dl’integrité, prinzips fondamentai sön chi che al mëss se fondé l’ativité dl’aministraziun publica.

Ai rapresentëia n momënt de confrunt y de incuntada danter l’aministraziun provinziala y i zitadins, sciöche ince i grups desvalis de interes (stakeholder) por arjunje:

Al portal dla trasparënza

 Sitemap