Atualità

USP - Ai 5 de dezëmber, le dé internazional dl volontariat, ô l’Assessorat Ladin onorè i volontars che se dà ca por la comunanza en cunt de cultura ladina. Cun na festa culturala a La Ila ô l’assessur Florian Mussner ti di ofizialmënter dilan a düc i volontars. En chësta ocajiun ti gnaràl ince surandè na onoranza a n volontar de vigni comun, che é de ejëmpl tl ciamp dla cultura.

USP – Belau na miliarda ie ududa dant per la furmazion y cultura tl 2012. I majeri capituli reverda la scola y l dërt de studië. “L pudëi se istruì ie n dërt de uni persona che ti garantësc pruspetives y cualità de vita” à (NCUEI) ai 25 de nuvëmber dit l assessëura Sabina Kasslatter Mur.

USP – I miëur pec dl cuncors de leteratura scrit ora dal Assessorat provinziel ladin vën nce recunesciui cun la publicazion te doi libri. Sën iel unì scrit ora n cuncors per la realisazion di cuiertli de chisc doi libri. Per la segonda pert dl cuncors “Autëures Ladins Scrij” iel da vëncer de ndut 2.000 euro y de plù libri da pudëi crì ora.

USP – La Scola d’ert a Urtijëi ie dal 1872 cunesciuda per si gran tradizion. Cun la reforma dla scola auta ala chësta ann mudà inuem y se tlama sën Lizeum d’Ert. Che l ne ie nia me mudà l inuem ma che l nseniamënt ie unì adatà ai tëmps dajan majer pëis ala rujenedes, mantenian na gran pert pratica y juntan l nseniamënt de design, puderà uni un nstës jì a cialé: n juebia ai 17 de nuvëmber vëniel tenì n di dla porta davierta.

USP – Testemunianza de leteratura ladina viva y descuscion sun la rujenedes de mendranza tla leteratura à pità la sëira dl 9 de nuvëmber (INIER) tl Hotel Laurin a Bulsan. Sun nvit dl Assessorat ala Cultura Ladina deberieda cun l Südtiroler Künstlerbund à Rut Bernardi liet ora de si ultima publicazion “Lirica y prosa da piz a cianton”, si antologia data ora te na culaburazion sëura la sëides ladines ora.

USP – „Berg Heil! Alpenverein und Bergsteigen von 1918-1945“ se tlama l liber che unirà prejentà ai 17 de nuvëmber a Bulsan. La Biblioteca provinziela Friedrich Teßmann y l Alpenverein Südtirol nvieia ala prejentazion che scumëncia dala ot da sëira.

Ai 3 de nuvëmber 2011 ie morta Frida Piazza, una dla pionieres dla nrescida dla rujeneda ladina y na scritëura fina y inuvativa. L assessëur ladin Florian Mussner lecorda anda Frida y manda si cunduel a chëi de familia.

USP – Le mantignimënt di bëgns culturai ne n’é aladô dl Presidënt dla Provinzia nia ma n dovëi dl’aministraziun provinziala, mo dantadöt mëss ince les porsones privates avëi chësta convinziun. Cun chësc pinsier él gnü surandè (incö) ai 3 de novëmber tl Palaz Mercantil a Balsan 19 onoranzes. I assessurs Mussner, Kasslatter Mur y Berger à ince onorè döes families ladines: la familia Castlunger de Badia y la familia Ellecosta da San Martin.

USP - N mierculdi ai 9 de nuvëmber liej Rut Bernardi ora de si ultima publicazion “Lirica y prosa da piz a cianton”. La sëira de leteratura a Bulsan metuda a jì dal Assessorat ala Cultura Ladina deberieda cun l Südtiroler Künstlerbund pieta ucajion per mustré su la vivanda dla leteratura ladina te na culaburazion sëura la sëides ladines ora. Do la letura uniral tenì na descuscion sun la rujenedes de mendranza tla leteratura.

USP - Ai 10 de novëmber scomëncia tla Biblioteca provinziala Teßmann a Balsan na ligna de referac’ dedicà al motif prinzipal „Südtirol tl’Europa. Na chirida de fostüs”. La ligna de referac’ gnarà daurida dal storiograf Georg Mühlberger y dala storica d’ert Marion Piffer Damiani.