Atualità

USP – La Jonta provinziela à udù dant la scoles autes de rujeneda taliana ulache l vën pità na furmazion particulera che reverda la mujiga, sport, rujenedes y alimentazion. Duta chësta spezificazions tl cheder dla reforma dla scola auta, unirà d’autonn pitedes a Bulsan.

USP – Per ruvé tla graduatories de nsenianc tla scoles ladines muessen avëi fat n ejam de ladin dedicà. L proscimo ejam per nsenianc sarà chësta ann ai 21 de merz, n possa se lascé nuté su nchin al plu tert n sada ai 19 de fauré.

USP – Lies che fej atività tl ciamp dla cultura ladina à chëst ann dat ju de plu dumandes per n cuntribut provinziel. Nchin ala fin de jené à l Ufize per la Cultura Ladina giapà 83 dumandes de sustëni al’atività dla lies. Permez ala mesaria di ultimi ani ie la cumpëida auzeda de 20%. L aumënt dla dumandes desmostra che tla valedes ladines iel ti ultimi ani for de plu lies che fej atività culturela.

USP – La fiera Futurum ne unirà chëst ann nia dedicheda a duta la furmazion dala scolina nchin al’università, ma defin ala reforma dla scola auta. Chësc ie dantaldut de utl per la families de sculeies che muessa nchin ala fin de merz avëi cris ora na scola auta. La terza edizion dla fiera Futurum sarà da udëi dai 17 nchin ai 20 de fauré a Bulsan.

USP – Da d’altonn gnaràl indô pité trëi scores altes a La Ila. Les novitês, les mudaziuns y dötes les informaziuns de ütl por chirì fora öna dles scores vëgn presentades en jöbia, ai 10 de forà tratan na sëra de informaziun tla scora alta da La Ila. I geniturs y düc’ i interessà é invià dales ot da sëra.

USP – La Jonta provinziela ie stata a una che l’università se damande n livel plu aut dla rujenedes per scumencé n studi. “La forza dl’università de Bulsan ie la rujenedes, perchël sustenions i pruvedimënc per auzé l livel de chësc pont de forza” à dit l presidënt dla provinzia.

USP – Ala descuscion sce tò demez l relief de Mussolini sun l palaz dla finanzes a Bulsan o no, respuend la Jonta provinziela cun n cuncors de ideies. Te si senteda dl 07 de fauré (ncuei) iel unì dat pro de abiné adum prupostes che ne desdruj nia l relief, ma che l ne sibe nia plu da udëi ala lergia y che l ne sibe nia plu na pruvocazion per la cunvivënza dla grupes de rujeneda.

USP – La Jonta provinziela à dat pro i urientamënc spezifics per la scoles autes. La dezijion di assessëures provinziei reverda la spartizion dla scoles spezifiches per sport, mujiga y alimentazion. Chisc urientamënc spezifics reverda dantaprima la scoles de rujeneda tudëscia tla ziteies y ne toca nia la scoles autes ladines.

USP – Sculeies che ulëssa nfurmazion sun la vela nueva de scoles autes tl Südtirol giapa chisc dis n cudejel ulache i possa se fé n cheder dla situazion. L cudejel nuef ie na pert dla campania de comunicazion dla Provinzia de Bulsan sun la reforma dla scola auta y vën partì ora tla scoles mesanes, scoles prufesciuneles y scoles autes.

USP - l Ntendënt dla scoles ladines Roland Verra y l diretëur dl INVALSI Dino Cristianini à arjont n’acurdanza sun la proves de cumpetënza per i sculeies dla scola ladina. La proves unirà chëst ann fates ala fin dla scola elementera y dla scola mesana.