Atualità

USP - L segondo di dl festival dla mendranzes a Aosta à dat ucajion a paredlé la situazion scolastica danter la Catalogna, Bretagna, Aosta y la Ladinia. L scola ie una dla seves plu mpurtantes per mantenì la mendranzes etniches: ulache l sustëni publich ie dëibl, se à la cumenanza dat da fé.

USP – Tla Val d’Aosta iel inier, prim de setëmber unì giaurì l festival dedicà ai populi de mendranza. Deberieda cun la mendranzes dla region Aosta se anconta y paredlea chëst ann i catalans, bretons y i ladins reprejentei dal Assessorat ladin dla Provinzia de Bulsan. Duman vënderdi sarà l assessëur ladin Mussner ghest dl Festival.

USP - Ai 10 de setëmber 2010 vëniel tl zënter dla scoles autes a Urtijëi metù a jì l Di dla Scola ladina te na forma nueva. L unirà pità na sort de marcià dla ideies, na mostra de “bona pratiches” sun i argumënc dl plurilinguism, dla scienzes y dla criatività. L di dedicà a duc chëi che lëura per la scola ladina unirà giaurì dal presidënt dla provinzia Luis Durnwalder y dal assessëur Florian Mussner.

USP - N dumënia ai 5 de setëmber, avisa l anuel de 64 ani dal’acurdanza de Paris, unirà sëurandates la uneranzes dla Provinzia de Bulsan per l 2010. Cun l gran orden al merit uniral tl Ciastel Tirol unerà 12 persunaliteies che se à fat meric particuleres per l svilup dl Südtirol y che ne vif nia tla provinzia.

USP – Tla Val D’Aosta se anconta dai prim ai trëi de setëmber reprejentanc de plu mendranzes dl’Europa per n barat culturel y aministratif. L Assessorat culturel dla Region Aosta à chëst ann nvià l Assessorat ladin dla Provinzia de Bulsan a reprejenté la grupa de rujeneda ladina pra l “Festival des Peuples minoritares”.

USP – Les trëi ciantarines da La Val, cunesciudes sciche la grupa “Ganes” vif y lëura ti Paejes tudësc y tl’Austria. Per se tenì n cuntat cun la jënt de cësa y mparé a cunëscer d’autri ladins che ie oradecà fejeles pea l proiet dla plata internet „Ladins tl monn“. L assessëur provinziel Florian Mussner à n sëira (19 agost) ancuntà la “Ganes” pra si cunzert tl ciastel Trauttmansdorff a Maran.

USP – La families se nuzea ann per ann for de plu dla puscibltà de mandé la mutans y i mutons plu abenëura tla scolina. Na lege dl 2008 vëija danora la puscibltà de scrì ite i mëndri ala scolina bele cun 2,5 ani. Danter i scric ite per l ann de scola 2010/11 iel tla val Badia 26% de trëi ani y dessot, te Gherdëina iel 32% de chësta età. De cunseguënza devënta l’esigënzes de desferenzië l’ativiteies de scolina aldò dl’età for majeres.

USP – Cun la giaurida dla mostra de pitures de Lois Irsara tla sënta dl Istitut Ladin a San Martin saral da udëi la cuarta y ultima mostra artistica da chësc instà. La giaurida dla mostra persunela de Irsara per n vënderdi 20 de agost dala sies da sëira fej pert dla scumenciadiva cureda n culaburazion cun la lia “Ert por i Ladins”.

USP – La tradizion culturela dla lijëndes ladines dëssa giapé na majera lerch tl nseniamënt te scola. Cun materiai didatics nueves dai ora dala Ntendënza Ladina y dala Lia Culturela Fanes iel per l ann de scola nuef a desposizion na vela de materiai per mparé a cunëscer miec la lijëndes dl Rëni de Fanes.

USP – Ai 20 de agost uniral sëurandat la stieres da culaburadësses de ntegrazion tla scoles ladines. La nseniantes de ntegrazion che ie tla graduatories provinzieles per la scoles ladines possa se prejenté dala 9.30 tla Ntendënza Ladina a Bulsan.