Atualità

USP – Tl proscimo ann de scola, de autonn 2010 uniral tla Scola d’Ert Cademia a Urtijëi giaurì na sezion de mujiga. Ncuei 23 de nuvëmber à scumencià n’ena de pratica per sculeies dla scola mesana che finerà via n sada 28 de nuvëmber cun n di dla porta davierta per duc. N sada uniral fat de plu prejentazions dla cumposizion “art-fish-music”.

USP – Tla Galaria Prisma de Bulsan iel da udëi l’opres de artisc’ ladins che à fat pea l cuncors scrit ora dala Repartizion ala Cultura ladina dla Provinzia de Bulsan. N vënderdi sëira (20 nuvëmber) iel unì giaurì chësta mostra n ucajion dla premiazion de Philipp Messner y Giancarlo Lamonaca che à venciù l pest per artisc’ ladins.

USP – La Repartizion ala Cultura ladina dla Provinzia de Bulsan ova metù a jì n cuncors per artisc’ dla valedes ladines. N vënderdi ai 20 de nuvëmber sëuradajerà l assessëur provinziel ladin Mussner l pest provinziel per artisc’ ladins tla Galaria Prisma a Bulsan. Te chësta ucajion vëniel nce giaurì la mostra.

USP – La cunsultes provinzieles ai jëuni dla trëi grupes de rujeneda se anconta n iede al ann per na senteda cun duc deberieda per se baraté ora n cont de argumënc prinzipei dl’atività, manieres de lëur y fins da arjonjer. Da permò ie unì tenì chësta senteda a Persenon.

USP – Da moinla dëssel unì curà de plu i proiec che tol ite duta la grupes de rujeneda. Chësc ie unit ora n juebia (5 nuvëmber) dal’ancunteda danter i assessëures ai jëuni Mussner, Kasslatter Mur y Tommasini cun i presidënc dla trëi cunsultes ai jëuni Peer, Stuflesser y Lazzarini. Sciche argumënt dl ann ie unì cris ora l fé pea di jëuni tl ciamp dla furmazion.

USP - Sciche ciavalier, uem dl’aventura y ël de vita iel jit ncantëur tl mond dl medieve, sciche cianzunier se al pona fat gran inuem: Oswald von Wolkenstein. Chisc dis vëniel tl Ciastel Tirol, sëura Maran tenì n simposium cun esperc de inuem nternaziunel sun Oswald von Wolkenstein. N sada ai 7 de nuvëmber uniral tratà l raport danter l poet cunesciù y la Ladinia.

USP – La culaburazion danter la scoles ladines dla Provinzia de Bulsan y la scoles de Fedom y Ampëz dëssa unì renfurzeda. Cun chësta idea à na delegazion dla Scola ladina dla Provinzia de Bulsan deberieda cun na reprejentanta de Fascia vijità la scoles de Fedom y de Ampëz.

USP – Cie suzedel pa de particuler te n chemun o te n raion? A chësta dumanda ti stà do i cronisc’ ulenteres che documentea avenimënc per la generazions che vën do. La dodescesima ancunteda di cronisc’ unirà tenida n vënderdi ai 6 de nuvëmber tl Archif provinziel a Bulsan.

USP – “Pudonsa cun l aiut dla rujenedes arjonjer d’autra cultures o ie pa la defrënta rujenedes na sëida? Defrënta rujenedes cun defrënta mpurtanzes? Giaurì nosta identità à d’autra grupes de rujeneda?” N vënderdi ai 6 de nuvëmber dajerà i prufessëures Tullio De Mauro y Hans Goebel nce respostes a chësta dumandes. L Istitut Ladin „Micurà de Rü“ y l Assessorat provinziel ala Cultura Ladina nvieia dala 17.00 tl Palais Widmann a Bulsan.

USP – La situazion mudeda di mëndri y dla families te nosc tëmps mpënia for deplù l’atività te scolina. Te n ancunteda cun l assessëur provinziel ladin Florian Mussner à reprejentantes dl personal pedagogich dla scolina tudëscia y ladina (LSKA) purtà dant ciunes che ie al mumënt la majera dificulteies per la educadësses per ti vester ala situazion.