Atualità

USP – Rosmarie Crazzolara da S.Ciascian ie unida numineda ispetëura nueva dla Scoles ladines. La nomina da pert dl ntendënt Roland Verra vëija dant chësta ncëria cun scumenciamënt de setëmber 2009.

USP – Nchin ai 31 de merz possa patrons y aministradëures de archifs privac y de dlieja damandé n cuntribut provinziel per l mantenimënt o l miuramënt. De cumpetënza ie l Archif provinziel.

USP – Tla scoles de mujiga de rujeneda ladina à scumencià la iscrizions per l ann de scola che vën. Aldò dl Istitut per l’educazion musichela puderan se scrì ite nchin la fin de merz.

USP – I presidënc dla cunsultes di studënc de duta la Talia se à i dis passei ancuntà a Roma. Danter chisc fovel nce Renè Pescoll per la grupa de rujeneda ladina che à fat pea n program rich de ancuntedes, rujenan danterauter nce cun l minister Mariastella Gelmini.

USP – L’edizion nueva dla revista dla scola ladina "Aules" ie dedicheda al argumënt "Contra radicalism y viulënza". Chësta plata che vën spartida ora a duc i nsenianc dla scoles y scolines ladines ie nce da giapé tla Ntendënza Ladina a Bulsan.

“Le lingaz dla uma é üna dles arpejuns plü stersces dla porsona, al à raîsc che ne mör nia fora, gnanca sce na porsona se trasferësc te n ater paîsc”, scri l’assessur ladin Florian Mussner en ocajiun dl dé internazional dl lingaz dla uma. Le lingaz dla uma cun chël che an à imparè da ti dè espresciun ales prömes descovertes sön le tru dla vita devënta na unité cun la porsona instëssa che ne despartësc nia plü le pinsier dal lingaz.

USP - Sun la streda de Frea sëura Corvara uniral fat da nuef n puent. I lëures ie unì sëurandai chisc dis dal Ufize provinziel per apalc a Bulsan.

USP – Cun 13 y 14 ani muessa i jëuni tò na dezijion mpurtanta: la se trata de crì ora la streda che porta ala furmazion plu adateda. Ciuna scola auta o ciuna scola prufesciunela. La fiera dla scoles y di mestieres dai 12 ai 14 de fauré tla Stadthalle a Bulsan juda sculeies y genitores cun nfurmazions de utl.

USP – L’analisa di ejams de matura à mustrà su na tendënza valiva danter la scoles dla trëi grupes de rujeneda tla Provinzia de Bulsan. Chësc ie unì ora da n lëur fat dai servijes de evaluazion dla rujeneda tudëscia, taliana y ladina. I resultac dl’analisa ie unic prejentei da Rosa Maria Mussner, Bernard Hölzl y Francesco Magno te n cudejel.

USP - Genitores possa ntan chëst ena mo scrì ite si mutons y mutans per l ann de scola che vën. L ultimo di per la iscrizions ala scoles elementeres y mesanes tla valedes ladines ie l 31 de jené 2009. La iscrizions ala scoles autes te Gherdëina y tla Val Badia possa unì fates nchin ai 31 de merz.