Atualità

USP - I sculeies y la sculées che fej chëst ann la matura possa śën se arjinië ca plu a puntin per l ejam de matura. La Ntendënza ladina y l Ministero a Roma fej al savëi la materies che unirà chëst ann purtedes dant pra l segondo ejam scrit dla matura. Nce la materies per chëles che vën udù dant n ejaminadëur da dedora ie ruedes ora.

USP - Sciche udù danora dala lege muessel unì fat cuntroi sun i cuntribuc culturei cunzedui dala Provinzia. L vën cialà do plu avisa l 6% dla domandes suvenzionedes tl ann 2006: chëstes unirà trates ora a cajo ai 12 de dezëmber 2007.

USP - L’Assessur Provinzial Florian Mussner s’à ti ultimi dis fat n’idea dl insegnamënt d’integraziun tles scores dles valades ladines. Dantadöt tles scolines y tles scores elementares déssel gnì ciarè deplü a n’integraziun bunoria de mituns y mitans cun dificoltês, arata l’Assessur Provinzial, do avëi baié cun les maestres de sostëgn y cun pedagoghes. Mussner à laldè l’engajamënt da pert dles maestres y dles pedagoghes, sciöche ince dl grup de laûr por l’integraziun tles scores ladines.

LPA - Les Naziuns Unides à protlamè i 21 de novëmber sciöche le „Dé mondial dla televijiun“. L’Assessur Provinzial por la cultura ladina Florian Mussner tol chësc dé sciöche ocajiun por renvié ala gran importanza dla televijiun por le mantegnimënt y le svilup dl lingaz dla uma dla mendranza ladina te nosc paîsc. Mussner rengraziëia düc i jornalisc y i colaboradus, che dëida para pro les trasmisciuns televisives ladines.

(USP) En sabeda ai 20 de otober s’à döt rodè incër la musiga al forum cultural de Sëlva. Laprò él gnü constatè che l’interès por la musiga y por na formaziun musicala crësc de manira costanta y la domanda do posc´ tles scores de musiga superëia intratan l’oferta.

„ Nia aspetè che al sides i atri a baié de mendranzes, mo tó instësc la scomenciadia”: Le Presidënt dla Provinzia Luis Durnwalder à incö (12 de otober), en ocajiun dl Dé dla cultura ladina invié i ladins, a ester capazi de süa identité y cultura y tl medemo tëmp a ester europeisć convinti.

La musiga é chësc ann le punt zentral dl forum cultural ladin, che gnarà metü a jì en sabeda ai 20 d’otober 2007 a Sëlva. Le forum vëgn organisé dal assessorat ladin por la cultura y dala consulta provinziala por la cultura ladina.

N vënderdi, ai 12 de utober 2007, vëniel tenì tl Palais Widmann a Bulsan "l di dla cultura ladina". La tematica de chëst ann ie: " Globalisazion y identità: na oportunità o n pericul per la cultura ladina?" L cunvëni vën urganisà dal Assessorat per la cultura ladina.

I 5 de utober, Di nternaziunel di nsenianc y dla nseniantes, ie na bona ucajion per ti dé na majera valuta al lëur dla nseniantes, di nsenianc y de duta la educadëures dla scolina. I assessëures ala scola Florian Mussner, Otto Saurer y Luisa Gnecchi sotrissea la mpurtanza y la respunsabltà che à nseniantes, nsenianc y educadëures te nosta sozietà. La va de sustënì l personal pedagogich te si lëur che deventa da ann a ann for plu rie.

USP - N ucajion dl di dla scola ladina, ai 6 de setëmber a San Linert, iel unì rujenà dl plurilinguism. L assessëur per la scola y cultura ladina dut. Florian Mussner à nce auzà ora la mpurtanza dl ladin y chësc nia mé te scola ma dantaldut nce a cësa. L assessëur ti mbincia a duc i diretëures, nsenianc y educadëures legrëza y creatività per l ann de scola nuef.