Atualità

USP - Les uniuns ladines che fej cultura ciafa n sostëgn finanziar da pert dla Provinzia. Dan da püch à la Junta provinziala resservè indöt 288.300 euro por investiziuns culturales dles uniuns ladines. La domanda ê gnüda fata dal assessur ladin Florian Mussner.

LPA - En chësc ann él presciapüch n miliun d’euro plü co l’ann passè tl fonds dles premies de rendimënt por le personal insegnënt. Por insegnanc y educadus di paîsc ladins dla provinzia él 164.000 euro a desposiziun. Por düc i insegnanc y i educadus dla provinzia él indöt 4,129 miliuns d’euro tl fonds dles premies de rendimënt. Les intendënzes dles scores y i sindacac s’à metü a öna sön chësta soma.

USP - En mercui, ai 4 de mà 2005, à l’assessur ladin Florian Mussner tut ite scolares y scolars, insegnantes y insegnanc da Coira tl Ciantun di Grijuns tl Istitut Pedagogich Ladin a Balsan. La delegaziun svizra à orü s’informè sura la cultura y le sistem scolastich dles valades ladines. Ti dis che vëgn gnaràl fat vijita a de plü localitês y istituziuns ladines.

USP - L’Université lëdia de Südtirol ti dess ince jì adincuntra ai bojëgns dl grup linguistich ladin. L’assessur ladin Florian Mussner à baié cun le presidënt dl’Université Friedrich Schmidl y cun Theodor Riffesser, responsabl dla Repartiziun ladina tl’université, de na professöra de ladinistica che dess gnì metüda sö tla Faculté de Sciënzes dla Formaziun da Porsenù. Implü él ince gnü rajonè de n proiet de plurilinguism tles scolines y scores ladines.

USP - Nia ma por i scolars n’é les notes d’importanza mo bëgn ince por i insegnanc de Südtirol. Döt le personal insegnënt che à arjunt so titul de stüde pro n’université tl’Austria y ô tó pert al concurs por les scores elementares, mesanes y altes dles valades ladines mëss dè jö le zertificat de reconescimënt dl titul de stüde y ince l’atestaziun dla nota globala de stüde cina ai 20 de mà 2005 pro l’Intendënza Ladina a Balsan.

USP - Sot ala presidënza dl assessur Florian Mussner él gnü tignì l’edema che é stada döes sentades dla Consulta por la cultura ladina dla Provinzia a Corvara. Le punt plü important sön l’ordinn dl dé ê le tratamënt de presciapüch 120 domandes de porsones che laora tl ciamp dla cultura. Al é gnü spôrt n contribut de 720.000 euro.

L’intendënt dles scores ladines Roland Verra à dan da püch nominé i presidënc y i comëmbri dles comisciuns d’ejam por i ejams de stat finai tles scores altes ladines por l’ann de scora 2004/2005. Tles scores altes ladines tla Val Badia y te Gherdëna se presentaràl indöt 39 candidates y candidac ai ejams statai, de chisc dui da privatisc.

USP - Tratan la pröma sëra de seleziun pro le “Festival da Chors” tignida en domënia, ai 10 d’aurì 2005 a Rueun tla Svizra rumancia à le cor dles ëres “Raiëta” da La Val albü n gran suzès. L’assessur ladin Florian Mussner che ê a Rueun cun la delegaziun ladina de Südtirol à podü ti fà sües mius congratulaziuns ales bones ciantarines da La Val.

USP - La scola ladina sperimenterà n l ann de scola che vën 2005/06 la reforma scolastica. L Assessëur per la scoles ladines Florian Mussner, l Intendënt dla scoles Roland Verra y l Diretëur de Repartizion Alexander Prinoth à prejentà la inuvazions chëst’ena a Urtijëi y a La Ila. “Laureron inant cun l sistem paritetich” à sotrissà l Assessëur Mussner. Ala sëires de nfurmazion à partezipà truep zitadins y truepa zitadines partezipan ala discuscion sun l svilup dla scola ladina.

USP - Pro le „Festival da Chors“ che gnarà tignì en domënia, ai 10 d’aurì a Rueun tla Svizra rumancia saràl presënt ince l’assessur ala cultura Florian Mussner. Chësta manifestaziun vëgn metüda a jì tl cheder dla colaboraziun danter i Ladins de Südtirol y i Retoromans dl ciantun Grijun. I cors ladins gnarà rapresentà dal cor dles ëres „Raiëta“ da La Val.