Atualità

Ince tles scores de Südtirol gnaràl recordè ai 27 de jenà cun le Dé dla memoria les vitimes dl nazism y dl fascism. L’assessuria y i assessurs ala scora de Südtirol Luisa Gnecchi, Otto Saurer y Florian Mussner ô ince se dè da fà por promöi na scora olache jogn y jones respeta i dërc dla porsona y va cuntra vigni forma de estremism.

(USP) L di dla cultura ladina, l forum culturel, na cunlaurazion strënta cun i Grijons y nia per ultim finanziamënc de sustëni per artisc y assoziazions cultureles: chisc ie i ponc zentrei dl plann anuel 2006 tl ciamp dl sustëni dla cultura ladina y dl’atività educativa, che ie sën unì apurvà dala Jonta provinziela sun dumanda dl Assessëur Florian Mussner.

Les iscriziuns ales scolines ladines por l’ann 2006/07 gnarà fates tl’edema dai 16 ai 21 de jenà. Tla scolina de vigni paîsc gnaràl tachè fora y comuniché les dates y i orars plü avisa. Al podarà gnì scrit ite i mituns y les mitans che compliarà i 3 agn cina ai 31 de dezëmber 2006. I nasciüs de jenà dl 2004 podarà gnì scric; ite sce al sarà lerch assà.

En lönesc à la Junta provinziala nominé danü le Consëi de Direziun dles scolines ladines. N valgügn comëmbri é restà anfat, d’atri é gnüs nominà danü. La surastanta dl Consëi de Direziun dles scolines è la direturia Edith Ploner.

Les trëi Intendënzes scolastiches dla Provinzia deboriada cun i Istituc pedagogics di trëi grups linguistics mët a jì ai 16 y 17 de novëmber 2005 n convëgn sön le “Portfolio europeich di lingac”. Tl “Pavillon de Fleurs” a Maran s’incuntaràl n grup de porsones espertes da sis paîsc europeics che tratarà da n punt de odüda internazional l’argomënt “Vivere le lingue/Sprachen leben und erleben/Viver la rujenedes”.

Les domandes de contribuc provinziai por ativitês culturales, sostëgn artistich y ativitês de formaziun po gnì dades jö cina ai 31 de jenà 2006; le terminn di 10 de novëmber 2005 vel ma por la cultura todëscia y nia por chëra ladina.

N juebia ai 20 de utober uniràl tenì per l terzo iede tl Parkhotel Laurin a Bulsan l “di dla cultura ladina”. L travert de chësta scumenciadiva ie chël de traté tematiches che tóca da daujin la grupa de rujeneda ladina y che possa nce nteressé l’autra grupes linguistiches. L tema dl di dla cultura ladina de chëst ann reverda i toponims ladins y si regulamënc puscibli. L cunvëni porta l titul “Ladinische Ortsnamen – Welche Regelung?” y vën urganisà dal Assessorat per la cultura ladina.

N sada, ai 8 de utober, iel unit metù a jì l forum culturel a Urtijëi. L tema de chëst ann fova la leteratura ladina.

USP - Tl’ Europa vëgnel baié za. 200 lingac. Na gauja chësta por festejè chësta pluralité en le “Dé europeich di lingac” ai 26 de setëmber y por recordè l’importanza di lingac, a pié ia da chël dla uma. “Le lingaz dla uma é la fondamënta por düc i atri lingac. Tl lingaz dla uma virel mîc arcaics, liëndes y cunties, la storia y le pinsier de n popul”, scrî i assessurs ala scora Florian Mussner, Otto Saurer y l’assessuria Luisa Gnecchi.

USP - Por le mëteman dl ann de scora nü gnaràl ince en chësc ann invié ia en vëndres, ai 9 de setëmber 2005 le Dé dla scora ladina a La Ila. I argomënc zentrai che gnarà tratà te chësta ocajiun é la scora ladina y sües particolaritês sciöche ince le percurs de formaziun y la cualité dla formaziun a livel nazional y internazional. Implü él ince sön le program n discurs da pert dl assessur por la scora Florian Mussner y dl intendënt Roland Verra.