Atualità

USP - Ai 4 d’aurì 2005 a Urtijëi y ai 5 d’aurì 2005 a La Ila rajonarà l’assessur Florian Mussner y l’intendënt Roland Verra sura la reforma dl sistem scolastich tles scores elementares y mesanes ladines.

USP - La Consulta di jogn y dles jones por le grup de lingaz ladin s’à dè jö inier, mertesc ai 15 de merz 2005 a Porsenù cun le plann anual por la promoziun dl laûr por y cun la jonëza te Gherdëna y tla Val Badia. Al pröm post sön la lista dles prioritês por ci che reverda les infrastrotöres él la realisaziun dl Zënter per Jëuni, Ert y Cultura Gherdëina a Urtijëi. I Sorvisc ai jogn de Gherdëna y dla Val Badia festejarà en chësc ann sü 20 agn de fondaziun cun n valgönes manifestaziuns.

USP - Co se svilupëia pa i pici mituns, co ési pa bogn da imparè y ciünes é pa les metodes educatives plü adatades? De chëstes chestiuns rajonarà le professur Wassilios Fthenakis dl’Université da Porsenù tla incuntada sön la pedagogia por l’infanzia che gnarà tignida ai 17 de merz 2005 a S. Cristina. I referac vëgn organisà dala direziun dla scolina “Ladinia”.

USP - Ince la scora ladina porvarà fora tl ann de scora 2005/2006 la reforma dla scora. Incö lönesc, ai 7 de merz 2005, à la Junta provinziala fat fora sciöche la reforma dla scora gnarà concretisada. Insciö gnaràl porvè fora ince tles scores ladines l’insegnamënt individualisé cun materies de basa, materies opzionales d’oblianza y materies opzionales, le sostëgn individualisé tl imparè tres n tutor y ince le portfolio sciöche stromënt de valutaziun.

USP - Sëgn él dan man i terminns sigüsc por i ejams de concurs di insegnanc dles scores ladines. L’Intendënza ladina sot ala direziun dl ispetur dla scora ladina Lois Ellecosta à metü jö n calënder cun dötes les dates. “La maiù pert di ejams scric gnarà tignis ti dis incër les festes da Pasca” à dit l’ispetur Ellecosta. Insciö po i insegnanc s’arjigné ca ai ejams por tëmp.

USP - Nia ma por i scolars n’é les notes d’importanza mo bëgn ince por i insegnanc de Südtirol. Döt le personal insegnënt che à arjunt so titul de stüde pro n’université tl’Austria y ô tó pert al concurs por les scores elementares, mesanes y altes dles valades ladines mëss dè jö le zertificat de reconescimënt dl titul de stüde y ince l’atestaziun dla nota globala de stüde cina ai 31 de merz 2005 pro l’Intendënza Ladina a Balsan.

Insegnantes y insegnanc de rode che laora tles scores elementares, mesanes y altes de Gherdëna y dla Val Badia y oress damanè de gnì trasferis à tëmp cina ai 4 de merz 2005 por dè jö süa domanda tl’Intendënza Ladina a Balsan.

USP - Por nos Ladins sciöche mendranza é le mantegnimënt y la promoziun dl lingaz dla uma de importanza vitala” à sotligné l’assessur Mussner en gaujiun dl „Dé internazional dl lingaz dla uma“, che vëgn tignì vigni ann ai 21 de forà. Implü rengraziëia Mussner dötes les porsones che se dà da fà por conservè y coltivé le lingaz ladin. Le fin de chësc dé mondial metü a jì dal’ONU por l’educaziun, la sciënza y la cultura é la sconanza di feter 6000 lingac slarià fora sura döt le monn.

USP - En gaujiun dl dé dla porta daverta incö mercui, ai 16 de forà 2005 à les scolares y i scolars dla Scora d’ert “Cademia” a Urtijëi presentè süa scora y sü laûrs artistics. Sot al moto “Pop in day” à chi che é gnüs a vijité la scora ince podü deventè instësc creatifs.

USP - Tl’Intendënza ladina él sëgn dan man le calënder provisore por i ejams de concurs dles insegnantes y di insegnanc dles scores ladines. “La maiù pert di ejams scric sarà ti dis incër les festes da Pasca” à dit l’ispetur dla scora ladina Lois Ellecosta. Dui ejams gnarà bele tignis ala fin de forà, y plü avisa “Fotografia y grafica publizitara” y “Pitöra”.