Atualità

Les lies culturales ladines po presentè domanda de contribut por ativitês culturales ala Provinzia cina ai 31 de jenà 2005 à comuniché l’Assessur ala cultura ladina Florian Mussner. I formulars por fà domanda de contribut gnarà portà dant dal Ofize cultura y scora ladina te döes sëres d’informaziun ai 6 de dezëmber 2004 a Urtijëi y ai 10 de dezëmber 2004 a San Martin de Tor. Dötes les porsones interessades é dër bel inviades.

Tröpa jënt à tut pert ala sëra de letöra y discusciun cun l’auturia Maria Pedevilla y l’autur Ivan Senoner che la Repartiziun provinziala Cultura Ladina à metü a jì l’edema che é stada a La Ila. La proscima sëra de letöra d’autur gnarà tignida en jöbia, ai 25 de novëmber a Urtijëi.

Ince en chësc ann gnaràl tignì ai 20 de novëmber sura döt le monn le “Dé internazional di dërc dl’infanzia”. Chësc dé se basëia sön la Convenziun internazionala aprovada dal’Adunanza dles Naziuns Unides ai 20 de novëmber dl 1989 tla cité de New York. Cina sëgn é la Convenziun gnüda ratificada da 190 paîsc dl monn, tolon fora i Stac Unis y la Somalia.

34 insegnantes y insegnanc dla scora elementara y mesana dles valades ladines à tut pert al scioper nazional protlamè incö lönesc, ai 15 de novëmber 2004. “Tles scores altes n’él stè degügn insegnanc che à tut pert” à lascè al savëi l’Intendënza ladina.

USP - La Repartiziun provinziala Cultura Ladina mët a jì ai 18 de novëmber a La Ila y ai 25 de novëmber a Urtijëi döes sëres de letöra olache i auturs ladins che à davagné le concurs leterar “Auturs ladins scrî ...” liarà dant sües cunties. Dötes les porsones interessades é sambëgn inviades a tó pert.

USP - Proiec por y cun la jonëza tles valades ladines de Südtirol é stà l’argomënt prinzipal dla sentada dla consulta ladina dles jones y di jogn che é gnüda tignida en mercui a Urtijëi. La presidënta Michaela Taibon à fat n valgönes propostes de proiec da realisé: tla Val Badia déssel gnì invié ia n proiet de barat cultural cun jones y jogn tl’Uniun Europeica y te Gherdëna déssel gnì metü a jì n bus da de nöt. L’ofize provinzial laûr por y cun la jonëza programëia implü da realisé n valgönes trasmisciuns ladines por la jonëza.

USP - La Repartiziun provinziala Cultura Ladina mët a jì ai 18 de novëmber a La Ila y ai 25 de novëmber a Urtijëi döes sëres de letöra olache i auturs ladins che à davagné le concurs leterar “Auturs ladins scrî ...” liarà dant sües cunties. Dötes les porsones interessades é sambëgn inviades a tó pert.

USP - Te n valgügn dis podarà l’auturia ladina Rut Bernardi pié do le pest „Walter von der Vogelweide“. L’Assessur provinzial Florian Mussner ti fej porchël les mius audanzes y lalda l’auturia por so impëgn por la cultura y le lingaz ladin.

USP - “La scora tles valades ladines y süa storia é na pert importanta dla cultura ladina y de chëra de Südtirol” à alzè fora l’assessur provinzial Florian Mussner pro le dé dla cultura ladina tignì incö a Balsan. La storia dla scora ladina é stè l’argomënt prinzipal dla manifestaziun a chëra ch’al à tut pert rapresentantes y rapresentanc di comuns, dles istituziuns, dla scora, dla scolina y de d’atri ambiënc culturai de trames les valades ladines.

USP - Por le secundo iade vëgnel tignì en vëndres, ai 22 d’otober 2004 le “Dé dla cultura ladina”. Le fin de chësta manifestaziun é chël d’alzè fora tematiches che reverda la mendranza ladina mo che po ince ester d’interès por i atri grups linguistics. L’argomënt de chësc ann é la “Storia dla scora ladina tl tëmp dan y do les Gran Veres”. La manifestaziun vëgn organisada dal Assessorat provinzial por la cultura ladina. Ala manifestaziun tolarà ince pert le Presidënt dla provinzia Luis Durnwalder, l’ Assessur por la scora y cultura ladina, Florian Mussner, l’ Assessuria por la cultura todëscia, Sabina Kasslatter Mur y l’ Assessur por la cultura taliana, Luigi Cigolla.