Atualità

USP – Per l prim iede iel chëst ann unì fat l cuncors provinziel de educazion politica tres internet. Danter i 200 sculeies dla scoles mesanes, scoles autes y scoles prufesciuneles se à i ladins dantaprima fat valëi tla scola mesana. L cuncors ie unì metù a jì dala Ntendënza, l Istitut pedagogich y la Repartizion per la furmazion prufesciunela.

USP - Le archif digital di foliec dla Biblioteca provinziala Friedrich Teßmann contëgn sëgn ince le foliet „Boten von Tirol und Vorarlberg“ che é gnü digitalisé deboriada cun les biblioteches de Vorarlberg, Tirol y dl Trentin por ci che reverda i agn 1813-1919.

USP – La scoles autes te Gherdëina y tla Val Badia pieta per l ann de scola che vën nuviteies. A Urtijëi vëniel pità mujiga y sport, a La Ila na furmazion soziela y pedagogica. Nteressei ala scola auta paritetica ladina possa mo nchin ai 31 de merz se scrì ite per la ann de scola 2010/11.

USP – “Wer rettet die Helden?” sota chësc titul se prejënta l Forumtheater Andreas Hofer 2010 n vënderdi ai 12 de merz a Urtijëi. L pez trata de argumënc esistenziei y dassënn umans tenian cont dl cuntest storich, nvian tl medemo tëmp l publich a fé pea. L Forumtheater ie na scumenciadiva dl Ufize provinziel per la furmazion.

USP – Doi dis per jì a cialé y purvé a depënjer, mudelé o ziplé: chësc pieta la Scola Prufesciunela per l artejanat artistich ai 12 y 13 de merz. I dis de porta davierta per sculeies y families scumëncia bele la sëira dant cun na descuscion publica sun la furmazion y marcieies dl artejanat artistich de Gherdëina.

USP – L nteres dl publich ie stat majer che i urganisadëures se ëssa aspità: nsëira, 4 de merz, iel tl filmclub de Bulsan unì prejentà cun suzes l film sun i ladins ntan l 20esim secul. La se trata de film documenter pe mustré su l destin dla jënt ladina y per se de jù cun na pert scura dla storia ladina. Cun si prejënza à na gran cumpëida de jënt respundù cun entusiasm al nvit dl presidënt Durnwalder y dl assessëur ladin Mussner.

USP - La cumiscion per lauré ora la lege provinziela nueva sun la Reforma dla Scoles Autes y dla furmazion prufesciunela, metuda adum da reprejentanc dla Ntendënza Ladina, Taliana y Tudëscia y dla furmazion prufesciunela, sun ncëria di Assessëures ala Scola Mussner, Kasslatter Mur y Tommasini, se à ancuntà plu iedesc y ie a n bon pont per mëter dant per tëmp y ëura l documënt ai organns politics dla provinzia.

USP – Sun scumenciadiva dla trëi ntendënzes provinzieles se anconta (duman) ai 3 de merz nsenianc y culaburadëures pedagogics per n barat de esperienzes. La terza ancunteda per maestres y maestri dla trëi grupes de rujeneda vën tenì tla Ntendënza ala scola tudëscia a Bulsan y ie dedicà ala scolina ladina.

USP – Nchin ai 11 de merz à artisc’ dla valedes ladines mo dl’aurela per fé pea i cuncorsc scric ora dal Museum Ladin Ciastel de Tor. L pest dunà da Richard Agreiter ie scrit ora per scultëures tl Tirol storich cun la valedes ladines dla Dolomites. Ala Trienala Ladina tl Museum Ladin possa fé pea atisc’ ladins dla Dolomites, di Grijons y dl Friul.

USP - Cun la dificulteies dl mparé, n problem che reverda truep sculeies, se à ncuei (24 fauré) dat ju feter 350 nsenianc y respunsabli de scoles, psicologhes y educadëures. Pra la giaurida dl cunvëni metù a jì dala ntendënza tudëscia, à l assessëura Kasslatter Mur sorissà che la scoles autonomes à i mesuns per lauré sun chisc problems tres la ntegrazion.