Atualità

Söporjö 100 esperć y colaboradus di musems dl Südtirol s’à incuntè incö, lönesc ai 2 de merz tl Museion da Balsan por la nona incuntada anuala tl contest dl Dé di Museums dl Südtirol. Le tema prinzipal dl’incuntada é stè „Young & Museum“, la vijiun che fajarà da cornisc por döt l’ann tematich.

Ćina la fin de merz pon se scrì ite por l’ann 2015/16 dles scores de musiga y por les edemes da d’isté 2015. Les iscriziuns por les scores de musiga dla Val Badia y de Gherdëna mëss gnì dades jö tles döes direziuns cun sënta a La Ila y a Urtijëi.

Odëi sciöche al vëgn laurè söl post, analisé le svilup dl insegnamënt tles scolines y constatè la complessité dl laûr dles maestres aldedaincö:chisc é stà i punć prinzipai dla vijita da inier (26/02) dl assessur Florian Mussner, dl intendënt Roland Verra, dl’ispeturia Edith Ploner, dla direturia Hannelore Insam y dla responsabla por l’intlujiun Carla Comploi a n valgönes scolines dla Val Badia.

En lönesc, ai 09/03 s’incunta i rapresentanć dles scolares y di scolars dl‘Euregio por presentè deboriada sües ghiranzes, danterater sön „l’educaziun politica“, la mobilité y i sistems de valutaziun y por se baratè fora cun le rapresentant di scolars federal austriach Lukas Faymann. Do la sentada plenara danmisdé él preodü na conferënza stampa dales 14.30.

Por daidé i scolars y les scolares dla scora mesana da to la dezijiun sön ći scora alta chirì fora vëgnel organisé plü dis dla "porta daverta" y manifestaziuns d’informaziun te döt Südtirol: ai 03 de merz él sön le program le Dé dla porta daverta tl „ITE – WFO – Sport Raetia“ a Urtijëi y ai 06 de merz tla Scora d’Ert „Cademia“ y scora profescionala por l’artejanat artistich.

Do che le laûr dles ëres ê stè por secui chël dles paures, s’àl daurì por vëres tl 20ejimo secul plü poscibilitês de laûr. Na suraodüda dl svilup tl monn dl laûr dles ëres tla perioda dal 1930 al 1970 y i mudamënć che taca laprò vëgn pitada dala mostra fotografica „Les ëres y le laûr“ che gnarà daurida ai 2 de merz a Balsan.

L’UNESCO ti dedichea uni ann n dì aposta ala defendura dla rujeneda dl’oma. Chësc dì ie ai 21 de fauré y ti dà n’atenzion particulera al mantenimënt di lingac de mendranza. "L’adurvanza y la cura dla rujeneda dl’oma ie, dantadut per la mendranzes, la fundamënta per mantenì l’identità culturela y dé inant la memoria storica y la usanzes ala generazions che vën docà", nsci l assessëur ladin Mussner.

La scomenciadia “Bücherwelten” cun l’esposiziun de libri premià é jüda a piz dan da dui dis (11/02) tl Waltherhaus a Balsan. Les publicaziuns premiades tl ann passè vëgn insciö presentades da en mercui ai 8 de forà inant por n mëis tl foyer dla Biblioteca Provinziala Dr. Friedrich Teßmann y po inće gnì imprestades fora.

L’Aziënda Speziala dla RAS garantësc da oramani 40 agn la trasmisciun de programs radio y televisifs ladins y todësch di Paîsc confinanć.„Chësc colegamënt cun i raiuns dla cultura todëscia y ladina é dër important por le svilup de nostes mendranzes“, sotlignëia le presidënt dla Provinzia Arno Kompatscher. La basa é gnüda ponüda avisa dan da 40 agn, ai 13 de forà dl 1975, cun la lege dla RAS.

Cun l’ingrés tl conflit dla Talia ai 23 de mà dl 1915 à la Pröma Vera Mondiala inće arjunt le Tirol y le frunt dles Dolomites. Do che les trëi Provinzies dl’Euregio à ponü la basa por recordè deboriada l’aniversar, à incö (10/02) la Junta provinziala aprovè les scomenciadies de comemoraziun che gnarà tignides te Südtirol tl 2015. I proieć reverdarà plü lingać y düć trëi i raiuns.