Atualità

USP – Tl zënter de Urtijëi à sculeies dl Lizeum d’ert cun Scola prufesciunela „Cademia“ ntan duta l’ena laurà per n cuncors de scultures de dlacia. Danter la cin bozes che ie unides zipledes te na mesura 10 iedesc mo ntan granda, à (NCUEI) ai 18 de jené, venciù la scultura “Vecchia Romagna”. L cuncors metù a jì te na culaburazion cun la Lia turistica y l Chemun à pità lezions de scola particuleres ai sculeies y na bela atrazion turistica per l luech.

USP – Tl raion da jì a pe de Urtijëi iel (NCUEI) ai 14 de jené unì metù man de fé scultures de dlacia. Sculeies dl Lizeum d’ert cun Scola prufesciunela de Urtijëi lëura deberieda cun si maestri nchin a n vënderdi de chëst’ena per n cuncors metù a jì n culaburazion cun la Lia turistica y l Chemun de Urtijëi. La scultures de dlacia vën chëst ann fates do modiei de bozes.

USP - La Repartiziun Cultura y Intendënza ladina adöm cun la Consulta culturala provinziala por le grup linguistich ladin lascia alsavëi che les domandes por n contribut provinzial por l’ativité culturala 2013 mëss gnì dades jö ćina ai 31 de jenà dl 2013. Les domandes de contribut por investimënć, proieć culturai, ativitês artistiches y de formaziun po gnì dades jö tratan döt l’ann.

USP – Per l prim iede vën l nseniamënt dla rujeneda ladina tla scoles autes sustenì cun na unità didatica. L servisc provinziel de Inovazion y Consulënza per la scoles ladines à dat ora materiai de nseniamënt sun la storia dl film. A chësta maniera iel unì arjont doi obietives: pité cuntenuc modernes che nteressea i sculeies y se nuzé dla rujeneda dl’oma tl nseniamënt de scola auta.

USP – L Ufize Urientamënt scolastich te Sëlva à trapinà tla cësa de Chemun. Chësc ie stat de bujën davia che i locai tla cësa de cultura vën adurvei provisoriamënter per la lezions dla scola mesana. I numri de cuntat ne ie nia unic mudei.

USP – I cuntribuc provinziei a sustëni dla cultura muessa aldò dla lege nce uni cuntrolei. Tla Repartizion ala Cultura Ladina vëniel n vënderdi ai 28 de dezëmber trat ora 6% di benefizeres de cuntribuc dl ann 2011 che unirà pona cuntrolei.

USP - Pra l cuncors provinziel de leteratura à l romann de Ivan Senoner tucà tan dassënn la cumiscion che l ie unì premià cun la publicazion. Ai 19 de dezëmber ie l liber nuef scrit per gherdëina unì prejentà ntan na sëira de leteratura a Urtijëi.

USP – Cun l cunzert d’Avënt tl Dom de Bulsan à sies grupes ladines (N SËIRA) ai 14 de dezëmberS nia me prejentà la tradizion particulera di luesc ladins de cianté y suné l’Avënt. Sun scumenciadiva dl Assessorat provinziel ladin iel unì pità mumënc de ancunteda danter la grupes de rujeneda.

USP – Ivan Senoner ova pra l cuncors provinziel de leteratura ladina venciù n pest straurdiner: si romann ie unì valutà tan bën dala cumiscion che l ie pona unì publicà te n liber a pert. N mierculdi ai 19 de dezëmber unirà chësc liber nuef, che trata de n romann scrit per jëuni, prejentà tl zënter per jëuni a Urtijëi. L assessëur Florian Mussner rujenerà dl valor de chësc liber per la mendranza ladina y Judith Piccolruaz cumpanierà la sëira de leteratura al tlavir.

USP - Per l prim iede te chësta legislatura se à la trëi cunsultes provinzieles de jëuni y jëunes, chëla per la grupa de rujeneda tudëscia, la taliana y la ladina, urtà pra na senteda deberieda. Tema prinzipel fova la dejocupazion junila te Sudtirol.