Atualità

Ma cun competënzes linguistiches adatades pó i mituns y jogn demostré sües capazités te scora y tla sozieté. Le sorvisc por la consulënza pedagogica y l’integraziun dl’Intendënza ladina á metü da jí chësc isté de plü scomenciadies por mituns y mitans cun y zënza n background de migraziun. „Partezipaziun, intlujiun y formaziun é na ghiranza de düc“, insciö l’assessur por la scora Florian Mussner.

Cinch posć culturai che ne é normalmënter nia daverc al publich pó gní vijitá ai 20 de setëmber en ocajiun dl De europeich dl patrimone. „Chëstes operes storiches nes dá la poscibilité da descurí le tëmp passé, mo ince da ponsé al dagní“, insciö l’assessur por i bëgns culturai Florian Mussner incö (14/09) ala presentaziun dla scomenciadia. Da odëi sarál ince na ciasa retica.

Le Departimënt Educaziun y Cultura Ladina dla Provinzia de Balsan inviëia düc i interessá al De dla Cultura Ladina olache an baiará de „Liberté de stampa: dërt d’informaziun y responsabilité di media“. Le convëgn gnará tigní, en presënza dl assessur Florian Mussner y de tröc esperc dl monn di media, en jöbia ai 24 de setëmber dales 09.00 inant tl Palaz Widmann a Balsan.

Sön proposta dl assessur Florian Mussner á la Junta provinziala aprové da püch le reconoscimënt dles ativités de formaziun extrascolastiches da pert dles scores ladines. Cun la lege omnibus gnará les diretives nöies aplicades por le pröm iade en chësc ann de scora 2015/16. „L’integraziun de ativités extrascolastiches é n arichimënt dl’oferta formativa por nostes scores", insciö Mussner.

Le presidënt dla Provinzia Kompatscher y i assessurs Mussner, Tommasini y Achammer á premié incö (ai 5 de setëmber) tl contest dl De dl’Autonomia i mius maturanc dl ann de scora 2014/15. Te chësta l’ocajiun ti fej la Junta provinziala ince les mius aodanzes a düc i scolars che metará man en lönesc ai 7 de setëmber l’ann de scora nü.

I 40 agn dl’Intendënza Ladina, l’adatamënt dl sistem scolastich ladin ala reforma statala, i conzec d’integraziun y dles inciaries da ciasa é stá i punc zentrai dl De dla scora ladina organisé incö (03.09) tla sënta dla scora mesana a Urtijëi. „La scora ne dess nia ma ester na fontana dl savëi, mo ince de valurs y de vita“, á recordé l’assessur Mussner.

En gaujiun dl scomenciamënt dl ann scolastich nü organisëia le Zënter de competënza y i Zëntri por la promoziun dl lingac che se crüzia dl’integraziun di scolars che vëgn da d’atri Paisc n convëgn d’ajornamënt por i insegnac. L’incuntada gnará a se le dé en lönesc ai 7 de setëmber dales 14.00 tl’Eurac a Balsan en presënza di assessurs Mussner, Tommasini y Achammer.

Cun na conferënza pedagogica á metü man incö al 1 de setëmber l’ann scolastich 2015/16 dles scores de musiga. I assessurs por la scora Florian Mussner y Philipp Achammer á inaudé la sajiun musicala nöia adöm cun le diretur de Departimënt Peter Höllrigl y la direturia provinziala dles scores de musiga Irene Vieder tla sënta dla scora profescionala por l’agricoltöra a Auer.

Cun incö al 1 de setëmber é Edith Ploner la presidënta nöia dl Consëi scolastich provinzial y che ará insciö la funziun de coordinaziun dles sentades plenares dl organ de consultaziun dla Junta provinziala sön tematiches che reverda le monn dla scora. Dl Consëi scolastich fejel pert rapresentanc di trëi grups linguistics dl Südtirol.

Sura 40 agn á Romi Crazzolara lauré te plü inciaries pro les scores dles valades ladines. Naota sciöche maestra, spo sciöche direturia dles scores elemetares dla Val Badia y dla direziun de Mareo y dal 2009 sciöche ispeturia dles scores ladines. „Cun süa profescionalité, dediziun, competënza y respet ára dé n gran contribut por nosta scora ladina y por la formaziun de vita“, insciö l’ass. Mussner.